Дмитрий Данилович 1920 сыл алтынны 25 күнүгэр Чурапчы оройуонун Муҥудай сэлиэнньэтигэр төрөөбүт. Муҥудай орто оскуолатыгар Дмитрий Красильников аатын иҥэрбиттэр. Нэһилиэккэ уонна оскуолаҕа улуу учуонай аатын үйэтитэргэ үлэ ыытыллар. Оскуолаҕа сылын аайы Красильников ааҕыылара ыытыллаллар. Сылын аайы “Тиһэх чуорааҥҥа” физика, математика, информатика предметтэрин олимпиадаларын кыайыылаахтарыгар Дмитрий Красильников аатынан анал стипендия туттараллар. Муҥудайга Бочуот скверигэр Дмитрий Данилович Красильников бүүһүн туруорбуттар.

Ил Түмэн ыччат дьыалатыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев Дмитрий Красильников 100 сааһын туолар дьоро күнүн бэлиэтиир тэрээһиҥҥэ Муҥудай орто оскуолатын учууталларын, нэһилиэк олохтоохторун эҕэрдэлээтэ. Улуу киһи үлэтин суолун учууталлаан саҕалаабытын, фашистары утары хорсуннук сэриилэспитин бэлиэтээтэ. “Дмитрий Данилович 1948 сыллаахха ССРС наукатын академиятын иһинэн Дьокуускайдааҕы чинчийэр базатыгар баар космическай сардаҥа станциятыгар үлэтин саҕалаабыта. Кини космическай сардаҥаҕа метериологическай дьайыыны үөрэтээһинтэн чинчийиитин саҕалаабыта. Космическай сардаҥа араас кэмҥэ дьайыыларын үөрэтэр сыалтан экспериментальнай ШАЛ олохтоммута”, -- диэн дьокутаат иһитиннэрдэ.

Дмитрий Красильников омук сирин уонна Арассыыйа биллэр учуонайдарын кытта ыкса сибээстэһэрэ, норуоттар икки ардыларынааҕы кэмпэриэнсийэлэргэ, симпозиумнарга кыттара диэн Михаил Гуляев эбэн эттэ. Ол курдук, 1947-1980 сс. бэчээттэммит «Исследование первичного космического излучения сверхвысокой энергии» диэн үлэлэрин иһин 1982 сыллаахха Дмитрий Красильниковка наукаҕа уонна техникаҕа Ленинскэй бириэмийэтин лауреатын аата иҥэриллибитэ.

Алтынньы ый бүтэһигэр “Россия – моя история” түмэлгэ Д.Д.Красильников төрөөбүтэ 100  сылыгар аналлаах виртуальнай быыстапка арыллыаҕа.

Ил Түмэн пресс-сулууспата.