Тимир сыбаайбалара ахсынньы 17 күнүгэр буолла. Оруобуна ити күн 1955 сыллаахха кинилэр Күөрэлээххэ саахсаламмыттара.
Егор Николаевич Черкашин 1934 сыллаахха төрөөбүтэ. Оҕо сылдьан сут кэмигэр ходуһа сыыһын ыраастааһыныгар, бааһынаҕа бурдукка уу кутуутугар үлэлээбит. Онтон улаатан, сайын Күөллэрики өтөҕөр кирпииччэ үктээһинигэр, сайын аайы окко буспут-хаппыт. Күөллэрикиттэн Балыктаахха диэри суол солуур үлэҕэ үлэлэспитэ. Ол сылдьан, тиэхиньикэни интэриэһиргиир буолан, 7-с кылааһы бүтэрэн баран, МТС-ка тырахтарыыс кууруһугар үөрэнэн, уһун сылларга тырахтарыыстаабыта.
Кэлин доруобуйатынан тохтоон, Укаанньанан, Даалыктанан, Бэһэр фермаларыгар оператордаабыта. Балыктаах орто оскуолатын үлэ сайыҥҥы лааҕырыгар үс сайын Иннокентий Васильевич Калачевтуун настаабынньыктаабыттара.
Парасковья Дмитриевна Максимова 1935 сыллаахха Чандаҕайыга төрөөбүтэ. Эмиэ кыра сааһыттан холкуос үлэтигэр сыыс ыраастааһыныгар, бугул түгэҕин харбаан, маһынан барар тыраахтарга мас эрбээн, үлэ үөһүгэр оҕо сааһа ааспыта. Улаатан, кыһын субай сүөһү көрүүтүгэр, сайын окко үлэлиирэ. Онтон ыанньыксыттаабыта. Биир фуражнай ынахтан 7 ый түмүгүнэн 786 л. үүтү ыан, Мэҥэ Хаҥалас оройуонун Бочуотун дуоскатыгар тахсыбыта.
Кэлин доруобуйата мөлтөөн, ньирэй көрөөччүнэн сылдьыбыта. Үлэлиир сылларыгар Саха АССР Бочуотунай грамотатынан, кыһыл көмүс чаһынан, иистэнэр массыынанан, ВДНХ боруонса мэтээлинэн наҕараадаламмыта. Москванан, Белоруссиянан күүлэйдиир путевканан сылдьыбытын билигин олус истиҥник саныыр.
Дьөгүөрдээх Бороскуобуйа 4 оҕолоруттан улахан уоллара Алексей Егорович Дьокуускайга Өрөспүүбүлүкэтээҕи балыыһаҕа хирурдуур, травматолог быраас. Элбэх киһини эмтээн, эпэрээссийэлээн, бар дьонун махталын ылар. Кыыстара Марфа Егоровна, сиэннэрэ Сахайаана – сиэстэрэлэр. Кыра уол Егор Егорович тутууга үлэлээбитэ. Билигин МЧС үлэһитэ. Сиэннэрэ, хос сиэннэрэ улаатан, кэлэ-бара сылдьаллар, эһэлээх эбээлэрин араас ситиһиилэринэн үөрдэллэр. Егор Николаевич эдэр ыччакка кэс тыла: "Үлэттэн олох салҕымаҥ, үлэ киһини киһи оҥорор эбит", -- диэн.
Ити курдук ытык кырдьаҕастарбыт Парасковья Дмитриевна, Егор Николаевич: “Олохтон салҕыбакка, үлэни өрө тутуҥ, үлэлээҥ, дойдугутун таптааҥ”, -- диэн этэллэр ыччат дьоҥҥо туһаайан.
Мария Захарова,
Балыктаах, Мэҥэ Хаҥалас.
- 0
- 0
- 0
- 0
- 0
- 0