Стоматолог тиис бырааһыттан уратыта диэн – кини үрдүк үөрэхтээх. Оттон тиис бырааһа орто анал медицинскэй үөрэҕи ылар.

Стоматология – мэдиссиинэ биир саамай былыргы салаатын быһыытынан биллэр. Ол курдук, Пакистан Белуджистан диэн провинциятыгар ыытыллыбыт археологическай хаһыыларга б.э. VI-IV үйэлэригэр олоро сылдьыбыт дьон уҥуохтара көстүбүттэр. Бу дьон тиистэригэр 1-3 мм диаметрдаах уонна 3,5 мм дириҥнээх дьөлөҕөстөрдөөх эбиттэр. Ити түҥ былыр тиис ыарыытын эмтииллэрин туоһулуур.

Арассыыйаҕа стоматолог күнүн аҕыйах сылтан бэттэх эрэ бэлиэтииллэр. Ол гынан баран, бэлиэ күн сыллата далааһына кэҥээн иһэр. Бу күн дьон-сэргэ тиис эмчиттэригэр дириҥ махталларын тиэрдэллэр.

“Santa Apollonia!”

Олунньу 9 күнүн Аан дойдутааҕы стоматолог күнүн быһыытынан мээнэҕэ талбатахтар. Католиктыы итэҕэллээх омуктар бу күн Сибэтиэй Аполлония Александрийская күнүн бэлиэтииллэр. Номох кэпсииринэн, былыр таҥараҕа итэҕэйбэт дьон Аполлонияны тутан ылбыттар уонна христианныы итэҕэлиттэн аккаастанарыгар модьуйбуттар, араастаан сордообуттар, муҥнаабыттар. Ол гынан баран, сибэтиэй дьахтар бэйэтин итэҕэлиттэн аккаастамматах. 249 сыл олунньу 9 күнүгэр бэйэтэ кутаа уокка ыстаммыт. Ол кэннэ бу сибэтиэй Аполлония бэлиэлэринэн – тиис уонна чыскы буолбуттар. Быһата, сидьиҥ дьон дьахтары сордуур-муҥнуур кэмнэригэр чыскынан тиистэрин туурбуттар, эрэйдээбиттэр.  Онтон ыла христианнарга итэҕэл үөскээбит. Өскөтүн тиистэрэ ыарыйдаҕына, “Santa Apollonia!” диэтэхтэринэн, тиистэрин ыарыыта ааһан хаалар үһү.

“Ил Түмэн” хаһыат олунньу 11 күнүнээҕи нүөмэригэр стоматология туһунан кэрэхсэбиллээх матырыйаалын булан ааҕаарыҥ.