Муус устар 27 күнэ – Саха сирин устуоруйатыгар бэлиэ күн. Бу күн биһиги биллиилээх судаарыстыбаннай уонна уопсастыбаннай диэйэтэллэрбит Максим Аммосов, Былатыан Ойуунускай, Степан Аржаков, Исидор Барахов уонна кинилэри кытта Саха сирэ автономнай өрөспүүбүлүкэ буоларын ситиспит, үгүс сыраларын уурбут дьоммут үтүө ааттарын кэриэстиир, сүгүрүйэрбитин, махтанарбытын биллэрэр күммүт. Кинилэр эрдээх санааларынан, дьулуурдарынан уонна норуот инники дьылҕатын туһугар кимиилээх туруорсууларынан Сахабыт сирэ өрөспүүбүлүкэ дэнэр анал туругун ситиһэннэр олох-дьаһах, экэниэмикэ, култуура эйгэтин өттүнэн дьоһун суолталаах уларыйыылар буолбуттара, төрөөбүт дойдубут салгыы сайдар кэскиллэммитэ.

Бүгүн Саха сирэ тутуу, бырамыысыланнас, үөрэх, доруобуйа харыстабылын эйгэтигэр уонна олох атын да хайысхаларыгар уһулуччу ситиһиилэрдээх Арассыыйа Федерациятын тэтимнээхтик сайдар субъектарын кэккэтигэр киирэр. Итинэн тохтоон хаалар сатаммат, инникитин Арассыыйа Аартыкатын баһылааһыҥҥа, 2035 сылга диэри Уһук Илини сайыннарар национальнай тосхолу, 2050 сылга диэри туһаайыллар сыалы-соругу быһааран туран, 2032 сылга диэри кэмҥэ Саха Өрөспүүбүлүкэтин олоҕун-дьаһаҕын уонна экэниэмикэтин сайыннарыы Стратегиятын олоххо киллэриигэ улахан амбициялаах былааннар бааллар.

Судаарыстыбаннаһы салгыы сайыннарыыга өрөспүүбүлүкэ хас биир олохтооҕун олоҕун уйгутун үрдэтиигэ туһуланар олох уонна үлэ өттүнэн сокуону оҥорууга төрүттэри оҥорор уонна тупсарар сорук турар. Бу уопсастыбаҕа аналлаах улахан соругу быһаарыы судаарыстыбаннаһы бөҕөргөтөр, уопсастыба-бэлиитикэ, олох-дьаһах уонна экэниэмикэ боппуруостарын быһаарыыны сокуонунан хааччыйар, гражданнар интэриэстэрин көмүскүүр аналлаах Саха Өрөспүүбүлүкэтин Ил Түмэнин иннигэр турар.

Өрөспүүбүлүкэ күнэ өссө Арассыыйа парламентаризмын күнүнэн билиниллэр. Парламентаризм дэмэкирээтийэ уонна уопсастыба бэлиитикэ өттүнэн ситиитин-хотуутун биир бэлиэтинэн буолар. Парламент норуот сувереннай көҥүлүн көрдөрөр судаарыстыба үрдүкү уорганын быһыытынан быраап мэктиэтин хаачыстыбатыгар уонна көдьүүһүгэр, киһи дьоһун олоҕор уонна көҥүл сайдарыгар хоруйу тутар.

Киэҥ далааһынаах уонна нэһилиэнньэ олоҕор ураты суолталаах саҥа бырайыактар Саха сирин парламентарийдарын сокуону оҥорууга көҕүлээһин быраабын көхтөөхтүк туһаныыга, былаас бары таһымыгар өрөспүүбүлүкэ чиэһин көмүскээһиҥҥэ эбээһинэстииллэр.

Кэлэр сылга элбэх омук дьонноох Саха сирэ Саха АССР төрүттэммитэ 100 сылын бэлиэтиир. Ити даатаны өрөгөйдөөх бэлиэтээһин умнууга хаалбат устуоруйа кэрэһитэ буолуоҕа.

Саха норуотун чулуу уолаттара кэлэр көлүөнэҕэ хаалларбыт нэһилиэстибэлэрэ биһиэхэ таһаарыылаах үлэнэн, былаас уонна уопсастыба аһаҕас диалогунан, гражданнар көхтөрүнэн өрөспүүбүлүкэбитин салгыы сайыннарыыга чуолкай ориентир буолар.

Өбүгэлэрбит кэс тылларын уонна үгэстэрин утумнаан, норуоппут ситиһиитин харыстаан уонна өссө элбэтэн, биһиги талааннаах, үлэҕэ бэриниилээх, бэйэлэрин өрөспүүбүлүкэлэринэн, кини историятынан уонна култууратынан киэн туттар дьоһун гражданнары иитэн таһаарыахтаахпыт.

Саха Өрөспүүбүлүкэтин Ил Түмэнин аатыттан Саха сирин олохтоохторун Өрөспүүбүлүкэбит күнүнэн итиитик-истиҥник эҕэрдэлиибин! Чэгиэн доруобуйаны, дьолу-соргуну уонна этэҥҥэ буолууну баҕарабын!

Саха Өрөспүүбүлүкэтин Ил Түмэнин Бэрэссэдээтэлэ Петр Гоголев