СӨ Үлэҕэ уонна социальнай сайдыыга миниистирин бастакы солбуйааччы Иван Алексеев:

--Социальнай үлэһит диэн идэ эрэ буолбатах, бу -- анал. Бу үлэҕэ ананан төрүүллэр: көмөлөһөргө өрүү бэлэм аһыныгас сүрэхтээхтэр, дьону өйдүүр үтүө майгылаахтар.

Билиҥҥи уустук кэмҥэ, COVID-19 ыарыытын утары охсуһар бириэмэҕэ, кырдьаҕастарга уонна доруобуйаларынан хааччахтаахтарга аналлаах интэринээт-дьиэлэр сабыллыбакка былааннаахтык үлэлии тураллар. Кыаммат-кыаллыбат соҕотох аҕам саастаахтары уонна тулаайах оҕолору ыаллар иитэ, көрө-харайа ылаллара уҕараабат.

2020 сыл муус устарыттан, пандемиянан хааччахтааһын буолуоҕуттан, биһиги үлэһиттэрбит социальнай өҥөнү оҥорор 24 тэрилтэҕэ вахтовай ньыманан үлэлии сылдьаллар, ол эбэтэр ыйы ыйдаан дьиэлэриттэн тэйэн үлэлииллэр. Ити иһин олус махтанабыт!

Кэнники кэмҥэ судаарыстыбаны таһынан социальнай өҥөлөрү оҥорор кэмиэрчэскэйэ суох тэрилтэлэр баар буолбуттара, аһымал аахсыйалара, пуондалара элбээбиттэрэ, волонтерскай хамсааһын күүһүрбүтэ, тэнийбитэ, “үһүс саас оскуолалара “ сэҥээриини ылбыттара үөрдэр.

Социальнай харысхал-көмүскэл аадырыстаммыт буолуохтаах – нэһилиэнньэ саамай көмөҕө, өйөбүлгэ наадыйар араҥатыгар. Кинилэр биһиги үлэһиттэрбит сыраларын, кыһамньыларын сыаналыыллар, итэҕэйэллэр уонна махтаналлар.

   Күндү кэллиэгэлэрбит! Эһиги профессиональнай хаачыстыбаҕыт үрдүгэ, туруоруллубут соруктары көдьүүстээхтик быһаарар сатабылгыт киэн туттуу санаатын саҕаллар. Идэҕитигэр бэриниигит, кыһамньылаах үлэҕит социальнай харалтабыт аатын  өрөспүүбүлүкэбигэр чиэстээхтик ааттатар.

Барыгытын өссө төгүл эҕэрдэлиибин уонна кытаанах доруобуйаны, чэпчэкитэ суох үлэҕитигэр ситиһиини баҕарабын!