— Бүгүн Саха Өрөспүүбүлүкэтин Ил Дархана Айсен Сергеевич Николаев үбүлүөйдээх төрөөбүт күнүн бэлиэтиир. Кини бэйэтин итэҕэлигэр бигэ эрэллээх уонна ылыммыт бириинсиптэрин хаһан да уларыппат. Саҕалаабыт үлэтин тиһэҕэр тиэрдэр, үрдүк сыаллары туруорунартан куттаммат уонна соруктарын ситиһэргэ дьулуурдаах.

Бэйэтигэр эрэллээх буолуута, сүдү кыаҕа уонна сатабыла дьоҥҥо-сэргэҕэ ытыктабылы үөскэтэр, ону тэҥэ төрөөбүт дойдубут, Сахабыт Сирин туһугар кыһамньылаахтык дьулуһан туран үлэлииргэ баҕа санаабытын уһугуннарар.

Кини үрдүкү кирбиини ситиһэргэ тэтимин ыһыктыбат уонна күүһүн дьэҥкэтик учуоттуур. Оттон саамай сүрүнэ - Айсен Сергеевич уопсай сыалы-соругу ситиһэргэ дьону көҕүлүүр, тэрийэр дьоҕурдаах. Үлэтин-хамнаһын батыһыннаран, тэҥҥэ хаамсан, дьыалаҕа ситиһиилээх буолары баҕарар.

Айсен Сергеевич: «Ханнык баҕарар идэ наадалаах уонна бочуоттаах», – диир. Хас биирдии киһи өрөспүүбүлүкэ сайдыытыгар киллэрэр кылаата сүдү суолталааҕын өрүү бэлиэтиир.

Ил Дархаммыт билиҥҥи кэмҥэ эппит тылыгар турар дьонтон биирдэстэрэ буолар. Кинини кытта өр сылларга ийэ буолуу уонна оҕо саас дьыалаларыгар, социальнай бэлиитикэҕэ бииргэ көдьүүстээхтик үлэлээн, олоххо дьиҥнээх көмөнү оҥорор тосхолу тутуһарыгар уонна дьиэ кэргэн институтугар дириҥ убаастабыллааҕын итэҕэйэбитим. Ол дакаастабыла – кэнники сылларга дьиэ кэргэн бэлиитикэтин сайыннарыы хайысхатынан олоххо киирбит араас хабааннаах бырайыактар туоһулууллар. Ол курдук, оҕо уһуйааннара уонна оскуолалар түргэн тэтиминэн  тутулуннулар, эрэгийиэн уратыларын учуоттаан, дьыссааттарга  ас-үөл биир тиһигэ оҥоһулунна, оскуолаларга «Ыраас уу» бырайыак өйөннө, оҕо былаһааккалара үлэҕэ киирдилэр, о.д.а. Ити көҕүлээһиннэртэн биирдэстэрэ – «Үйэ оҕолоро» тус сыаллаах ийэ хапытаала. Бу туһунан Ил Дархан Айсен Николаев Ил Түмэҥҥэ туһуламмыт Анал этиитигэр иһитиннэрбитэ.

Классическай оскуола үөрэнээччитэ буолан, идеалларга сүгүрүйэр, дьон-сэргэ дьоллоох буоларын туһугар олорор уонна үлэлииргэ бэлэм.

Айсен Сергеевич – аныгы кэм киһитэ: хорсун быһаарыылары ылынар, сонун ньымалары туһанар, тэтимнээх хамсаныылардаах уонна өрөспүүбүлүкэ дьонун олоҕун уйгутун тупсарар баҕа санаалаах. Кини инновационнай уонна креативнай идиэйэлэри өйүүр. Кэпсэтиилэргэ куруук аһаҕас.

Ил Дархаммытыгар баҕарабын кытаанах доруобуйаны, дьиэ кэргэҥҥэр дьолу, эрэллээх соратниктары, бэйэ күүһүгэр эрэли, дьэҥкэ, ыраас өйү-санааны уонна итии сүрэҕи. Чэпчэкитэ суох ыарахан кэмнэргэ дьиэ кэргэниҥ сылааһыгар угуттанан, эрчимнээхтик ай-тут, үлэлээ, доҕотторуҥ, чугас дьонуҥ мэлдьи өйөбүл буоллуннар!