«Пушкинскай каарта» ис хоһооно: эдэр дьону култуура уонна искусство эйгэтигэр сыһыарыы, кинилэр кэрэ өйдөбүлүн билэ үөрэнэллэригэр, өй-санаа өттүнэн ситэллэригэр, духуобунас таһымыгар тахсалларыгар усулуобуйаны тэрийии буолар.

Кимнээх туһанар кыахтаахтарый?

Бырайыакка 14-тэн 22-тигэр диэри саастаах 13 мөл. ыччат дьон хапсар кыахтаах. Кинилэр «Пушкинскай картааны» «ГосУслуги» партаалга https://www.gosuslugi.ru/ регистрацияланан, верификацияны ааһан, сайаапка толорон, босхо ылар кыахтаахтар. Каарта 2021 сылга лимиитэ 3 тыһ. солкуобайга тэҥнэһэр. Ол аата эдэр дьон дойду тыйаатырдарыгар уонна түмэллэригэр сылдьалларыгар киирии билиэттэрин төлөнүөхтэрин син. Бырайыак Арассыыйа үрдүнэн балаҕан ыйын 1 күнүттэн саҕаламмыт. Дойду 85 субъегар барытыгар номнуо 500-тэн тахса култуура уонна искусство тэрилтэтэ кыттыспыт. Ый кэриҥэ кэм иһигэр 1,5 мөл. киһи каартанан туһаммыт. Ханнык тэрилтэлэр «Пушкинскай каарта» кэккэтигэр киирбиттэрин «Культура.РФ» партаалга, биитэр «Госуслуги.Культура» анал сыһыарыыга көрүөххэ, кинилэр ыйдааҕы репертуарнай былааннарын булуохха сөп.

Онтон Сахабыт сиригэр?

Миниистир Юрий Куприянов кэпсээбитинэн, Сахабыт сиригэр бүгүҥҥү күҥҥэ 5 тэрилтэ бырайыакка киирэн, номнуо билиэттэрин атыылан эрэр эбит. Ол курдук, Д.К.Сивцев – Суорун Омоллоон аатынан судаарыстыбаннай опера уонна балет, А.С.Пушкин аатынан судаарыстыбаннай академическай нуучча драматическай тыйаатырдара, Г.М. Кривошапко аатынан өрөспүүбүлүкэ судаарыстыбаннай филармонията, Саха сирин национальнай уус-уран түмэлэ, «Моя история» историческай паарка. Маны таһынан  Ю.Е.Платонов аатынан судаарыстыбаннай эстрада уонна «Үүнэр көлүөнэ» судаарыстабаннай тыйаатырдара бэлэмнэнии үлэтин ыыта сылдьаллар.

Ааттаммыт тэрилтэлэргэ 464 киһи «Пушкинскай каартанан» билиэт ылан сылдьыбыта бэлиэтэммит. Былаан быһыытынан Сахабыт сиригэр 50 тыһ.эдэр дьон хабыллыахтаах, итинтэн аҥаардас киин куоракка 20 тыһ.олорор, үөрэнэр эбит. Ол аата судургутук эттэххэ, Дьокуускай куорат ыччата култуурунай сынньалаҥыгар 60 мөл.солкуобай көрүллүөн сөп. Ол эрэн бэйэбит олорон биэрбэккэ, судаарыстыба утары уунар көмөтүн толору туһаныах, иҥэриниэх кэриҥнээхпит.

«Атын да тэрилтэлэри сыыйа киллэрэн иһиэхпит», – диэн миниистир чуолкайдаата. Бырайыакка кыттыһарга сүрүн ирдэбил – култуура уонна искусство тэрилтэтэ электроннай билиэти атыылыыр платформаҕа көспүт буолуохтаах. Онон министиэристибэ бу хайысхаҕа үлэни күүһүрдэр былааннаҕын туһунан иһитиннэрдэ.

Бары өттүнэн сүүйүүлээх

Министиэристибэҕэ бу үлэни сүрүннүүр тустаах отдел салайааччытын Ньургуйаана Илларионованы кытта көрсөн чопчуластыбыт. Бары билэҕит, бу сыллар тухары оҕолорбутугар, ыччаттарбытыгар уһулуччулаах айымньыларбытын, сүдү суруйууларбытын, бастыҥ испэктэкииллэрбитин көрдөрөрбүтүгэр харчыга ыктарарбыт. Устудьуон аймахха, элбэх оҕолоохторго араастаан чэпчэтии ньыматын туруорса сатыырбыт. Дьэ, билигин бу кыһалҕаланар төлөрүйэр кэмнэрэ кэллэ.

Иккис курдук, Ньургуйаана Ивановна тыйаатыр, түмэл өрүү көрөөччүлээх, сүгүрүйээччилээх буоларыгар дьулуһуохтаахпыт диир. Ол оруннаах. Саҥаттан саҥа испэктээкил, быыстапка турарыгар, тэрилтэ айар бырайыактарын сүрүннүүрүгэр элбэх харчы эрэйиллэр. Маны таһынан хас биирдии артыыс толору саалаҕа оонньуура, түмэлгэ куруук дьон кэлэ турара айар эйгэлээх дьон кыһаллан, айымньылаах үлэ ис хоһоонугар умсарыгар эмиэ улахан суолталаах. Онтон искусство сайдыытын ылан эттэххэ, ханнык баҕарар тэрилтэ көрөөччүтүн сөхтөрөр, астыннарар гына үлэлииригэр, атыттартан чорбойо сатыырыгар тиэрдэр бастыҥ ньыма буолар.

Үсүһүнэн, «пушкинскай каарта» Сахабыт сиригэр эрэ буолбакка дойду ханнык баҕарар эрэгийиэнигэр үлэлиир кыахтаах. Большой театр, Третьяковскай галерея, Эрмитаж курдук дойдубут бастыҥ тэрилтэлэрэ эмиэ хапсаллар.

Тэриниэххэйиҥ, баһылыаххайыҥ!

Кырдьык, кыах бэриллибитин кэннэ хап-сабар дьаһанарбыт наада. Дьоммутугар, төрөппүттэргэ, ордук оскуолаларга, орто уонна үрдүк үөрэх кыһаларын учууталларыгар, педагогтарыгар тахсан, бу үлэни көҕүлүүллэригэр, нэһилиэнньэҕэ тиэрдэллэригэр көрдөһүөҕүҥ! Өссө төгүл бэлиэтээн этэр буоллахха, 23 сааһыгар сылдьар эдэр киһи 24-дүн туолуор диэри каартанан туһанар кыахтаах. Аны туран каарталарын толотторбут ыччаттар быйыл, 2021 сыл хаалбыт 3 ыйыгар, 3 тыһыынчаларын барыы охсуохтаахтар. Сыл бүтүүтэ ордук харчы хаалбыта умайан иһэр, кэлэр сылга көспөт. Ол оннугар кэлэр 2022 сылга каарта лимиитэ 5 тыһ. солкуобайга тэҥнэһиэ диэн тэрийээччилэр эрдэ сэрэтэллэр.