Үөттээх сиригэр 2 га сиргэ илии сеялкатынан ыспыттара, үүнүүтэ үчүгэй. Ортотунан 1 га бааһынаттан 6 туоннаҕа тиийэ күөх маассаны хомуйдулар. Онтон Остуолба сиригэр 1 га бааһына сирин оҥороот тута ыспыт уонна илии сеялкатын туттубакка “крестьянскайдыы” ыспыт буолан үүннүүтэ мөлтөх.
Сайын төһө да кураан буоллар, сир сиигэ куура илигинэ ыһыы үлэтэ ыытыллан, уу кутааһына суох куйаас күннэри тулуйда диэн бэлиэтиир Вадим Горохов.
«Хоту сиргэ ыһыы үлэтин ыытыы биһиэхэ улахан уопут буолар. ЯНИИСХ учуонайдара оройуоммут сирин буорун анализка диэн ылан барбыттара. Онон күөх маасса хоту дойду усулуобуйатыгар хайдах үүнэрин чинчийиэхтэрэ. Биһиги ыспыт эбиэспит Талисман диэн. Анал техникабыт суох буолан ыһыы, хомуйуу үлэтэ барыта илиинэн барда диэххэ наада. Быйыл кыһын ынах сүөһүгэ, сылгыларга сиэтэн, төһө эбиллэллэрин кэтээн көрүөхпүт. Инникитин улууска айылҕаттан тутулуга суох үчүгэй сүөһү, сылгы аһылыгын базата баар буолара буоллар диэн бу үлэни саҕалаатыбыт», - диэн санаатын үллэстэр Вадим Михайлович.
Үөһээ Дьааҥылар ыһыы, хомуур анал техниката суох да буоллаллар, толлон турбаттар. Эбиэстэрин илиинэн охсон, куурдан, от курдук кэбиспиттэр.
- 0
- 0
- 0
- 0
- 0
- 0