Эҕэрдэ суруктары нэһилиэк баһылыга А.В. Куприянов истиҥник эҕэрдэлээн туран туттарда.
Педагогическай үлэ бэтэрээнэ, педагог-маастар, СӨ үөрэҕириитин туйгуна, Мэҥэ Хаҥалас уран уус ускуустубатын талба талаана, бэртээхэй фотограф Владимир Николаевич Дохунаев Абый улууһун Сыаганнаах бөһүөлэгиттэн төрүттээх. Александра Петровналыын Намнааҕы педучилищеҕа үөрэнэ сылдьан билсэн, 1970 сыллаахха ыал буолбуттара.
Кинилэр 1971-1972 сс. Тыыллыма орто оскуолатыгар ананан үлэлэрин саҕалаабыттара. 1972 сыллаахха Балыктаах орто оскуолатыгар үлэлии кэлбиттэрэ. Онтон ыла Владимир Николаевич уруһуй, үлэ, черчение уруоктарын, үс ыарахан предмети дьүөрэлээн, хас да көлүөнэ ыччаты уһуйбута. Кини уруогар көрдөрөр босуобуйаны бэйэтэ чертежтаан оҥороро. Ону таһынан бииргэ үлэлиир учууталларын көрдөһүүлэринэн табылыысса оҥорон аҕалара. Онтукатын түүн хойукка диэри ойуулуурун ахталлар.
Кэбиниэти тупсаҕайдык оҥоруу систиэмэтэ саҥа сайдан эрдэҕинэ, Владимир Николаевич кэбиниэттэр ис-тас барааннарын киэргэтэн оҥорбута. Бырааһынньыктарга былакаат, транспарант суруйуута, хаһыат уруһуйа, суруга-бичигэ Владимир Николаевиһа суох табыллыбата. Ленинскэй хос, Мэҥэ нэһилиэгин историятын үөрэтэр музейы маһынан стеллажтаан, бэйэтэ хаартыскаҕа түһэрэн-суруйан оҥорбута. Владимир Дмитриевич Соловьевтуун 1980 сыллаахха Төҥүлүгэ "Албан аат" музейын оҥорбуттара. Владимир Николаевич мас ууһа, араас миэбэли, кыра остуоллары, ыскамыайкалары, олоппостору, чорооннору ис киирбэх гына оҥорор. Директорскайга миэбэл оҥорбута олох эксклюзивнай ураты көстүүлээх. Бэйэтэ бултуурун, айылҕаҕа сылдьарын сөбүлүүр, кус-хаас мончуугун бэркэ оҥороро. Владимир Николаевич уһуйбут-үөрэппит үөрэнээччилэрэ араас таһымнаах быыстапкаларга, олимпиадаларга кыттан, кэккэ ситиһиилэрдээхтэр. Элбэх уола уус, технология учуутала буолан үлэлии-хамныы сылдьаллар.
Александра Петровна Төҥүлүгэ төрөөбүтэ, Тараттан тардыылаах Цыпандиннар кыыстара. 1966 сыллаахха Төҥүлү орто оскуолатын ситиһиилээхтик бүтэрбитэ. Оскуолаҕа үөрэнэр сылларыгар спордунан утумнаахтык дьарыктаммыта. Баскетболга Төҥүлү оскуолатын солбуллубат хапытаана, "Бастыҥ бомбардир" дэппитэ, хайыһарга оройуонун чиэһин үгүстүк көмүскээн, 1 разрядтаах хайыһардьыт. Оройуон, өрөспүүбүлүкэ призера, волейболистка, теннисистка, велоспордунан дьарыктанара. Айылҕаттан бэриллибит көмүс куоластаах ырыаһыт. Билигин Балыктаах оскуолатын бэтэрээннэрин "Алгыс" ансаамбылын ырыаһыта. Педагог-маастар, эмиэ кэргэнин курдук, Мэҥэ Хаҥалас прикладной искусствотын уран тарбахтааҕа, СӨ Учууталларын учуутала, нэһилиэк бочуоттаах гражданина.
1972 сылтан интэринээккэ иитээччинэн, сэбиэдиссэйинэн үлэлээбитэ. Үлэлиир сылларыгар түмсүүлээх-иллээх кэлэктиип салайааччыта этэ. Маттаттан, Дойдуттан кэлбит оҕолорго дьиэлэрин курдук сылаас эйгэлээх буоларыгар кыһаллан, интэринээт материальнай базата тупсарыгар үгүс сыратын биэрбитэ. Билигин ол кэмҥэ интэринээккэ олорон ааспыт оҕолор ону сүрдээҕин махтана ахталлар.
Александра Петровна 1994 сылтан үлэ уруогун учууталынан үлэлээбитэ. Кылгас кэм иһигэр элбэх көрдөрөр матырыйааллаах, дириҥ ис хоһоонноох, үөрэнэргэ табыгастаах кэбиниэти тэрийбитэ. Ол түмүгүнэн 1997 сыллаахха кини кэбиниэтин базатыгар улуустааҕы "Кыыс оҕо -- ийэ бастыҥ көмөлөһөөччүтэ, олох киэргэлэ" диэн сэминээр ыытыллыбыта. Ол сыл Александра Петровна кэбиниэтэ көрүү күрэҕэр 2-с миэстэни ылбыта. Кыргыттары иискэ, ас астыырга үөрэппитэ. Араас таһымнаах быыстапкаларга, күрэхтэргэ кыттан, кэккэ ситиһиилэммиттэрэ. Оҕо дьоҕурун сайыннарарга үгүс сыратын биэрбитин үөрэппит оҕолоро махтаналлар.
Александра Петровна, Владимир Николаевич Дохунаевтар үс уол, биир кыыс оҕолоохтор. Элбэх сиэн, хос сиэн эбэтэ-эһэтэ буолаллар. Биһиги бөһүөлэкпит биир ытыктанар дьоһуннаах ыала билигин оҕолоругар-сиэннэригэр күүс-көмө өйөбүл буолаллар.
Мария Захарова,
Балыктаах олохтооҕо.
- 0
- 0
- 0
- 0
- 0
- 0