Бу сырыыга Иннокентий Трофимович Боппосов идиэйэтинэн уонна көҕүлээһининэн, быраата Иван Трофимовичтыын “Ford-T” массыынаны оҥорон, Аҕа дойдуну көмүскээччи күнүн көрсө, олунньу 21 күнүгэр Уолба бөһүөлэгин устун сүүртүлэр.
"Ford-T” аан бастакынан хас да мөлүйүөн сиэрийэнэн атыыга тахсыбыт массыына буолар. Генри Форд собуота 1908-1927 сылларга таһаара сылдьыбыта. Сыаната удамыр буолан, элбэх американец атыыласпыта. Дэлэҕэ Генри Форд: «Я посадил Америку на колёса», -- диэн интервьютугар билиниэ үһү дуо?
Өскөтүн кини «посадил Америку на колёса” буоллаҕына, Иннокентий Трофимович матасыыкыл спицалаах көлүөһэтин туһанан, массыына оҥоруон баҕарбыта ырааппыт.
Оҕо сырыттахтарына төрөппүттэрэ “Юный техник”, “Сельский механизатор”, “Конструктор” курдук сурунааллары суруйтараллар эбит. Уолаттар ону көрө-көрө, араас тиэхиньикэни таҥан оҥорор баҕалара өссө күөдьүйэн биэрэрэ үһү. Ол ыра санааларын толорон, кэлин тыа усулуобуйатыгар барсар, хаһаайыстабаҕа аналлаах 20-ча араас тиэхиньикэни тупсаран, айан оҥордулар.
--Оттон бу “Ford-T” сиэммэр Эрсааҥҥа анаан. Кини куораттан кэлбитинэн сибээстээн сүүртүбүт. Аҕабыттан хаалбыт мотороллер арааматыгар оҥордум. Көлүөһэтэ “Юпитер” киэнэ. 14 ат күүстээх сэп буолла. Куорпуһун фанераттан быһан. Каркаһын быраатым Иван Трофимович сыбааркалаабыта. Мин үлэлии сылдьабын, ОДьКХ-ҕа слесардыыбын. Оттон кини кыһын уоппуската, суолга үлэлиир буолан. Онон иллэҥ бириэмэлээх буолан, миигиннээҕэр ордук кини дьарыгырда да диэххэ сөп, -- диэн кэпсиир Иннокентий Боппосов.
Саамай кэрэхсэбиллээҕэ, Боппосовтар төрөппүт уолаттарын, сиэннэрин батыһыннара сылдьан, эр киһи сатабылыгар барытыгар кыраларыттан уһуйар үтүө үгэстээхтэр. Онон бу да массыынаны оҥорууга оҕолор илии-атах буоллулар. Чуолаан Иван уола Дьулус Боппосов улаханнык көмөлөстө. Кини Уолба Ленин аатынан оскуолатын VI кылааһын үөрэнээччитэ.
Саха сирин олохтоохторун сонун, ураты, сиэдэрэй оҥоһуктарынан сөхтөрөр, үөрдэр Боппосов аймахтан өссө да саҥа айымньылары күүтэбит.
- 0
- 0
- 0
- 0
- 0
- 0