Быйыл ол испииһэккэ саха уола Мичил Андросов киирдэ. Кини “Наука уонна технология” диэн номинацияҕа турда.
Мичил Дьокуускайга Хотугулуу-Илиҥҥи федеральнай университет математикаҕа уонна информатикаҕа салаатын бүтэрээт, “InDriver” сыһыарыыны оҥорууга үлэлэспитэ. Итини таһынан өссө айфоҥҥа сахалыы клавиатураны, интерактивнай остуоруйалар, оптуобустар сырыыларын көрдөрөр сыһыарыылары оҥорбута.
Былырыын Мичил “InDriver” сүрүн офиһыгар техническэй дириэктэринэн ананан, Москваҕа үлэлии барбыта. Кэргэннээх, оҕолоох.
- Мичил, Тайаана, Айсен -- үһүөн Москваҕа үлэлииллэр.
Бииргэ төрөөбүттэрэ эмиэ киһи киэн тутта кэпсиир ыччаттара. Быраата Айсен Хабаровскайга Тихоокеанскай университеты кыһыл дипломнаах бүтэрбитэ. Билигин эмиэ Москваҕа олорор, архитектурнай бюроҕа үлэлиир. Устудьуоннуу сылдьан, Потанин уонна РФ Президенин стипендиата этэ. Балта Тайаана аан дойдуга биллэр KPMG диэн бөдөҥ хампаанньа Нью-Йорктааҕы салаатыгар үлэлии сылдьыбытын туһунан кэпсээн турабыт. Эргиччи талааннаах дэгиттэр кыыс.
Манна даҕатан эттэххэ, үс бииргэ төрөөбүт үһүөн омук улахан хампаанньаларыгар үлэлээбит уопуттаахтар: Мичил — Гонкоҥҥа, Айсен –Техаска, Тайаана – Нью-Йорк куоракка.
- Айсен, Тайаана, Игнатий Поликарпович, Альбина Афанасьевна, Айталы уонна Мичил.
“Үс оҕо хайдах бары маннык ситиһиилээххит?” – диэн ыйытыыга, Андросовтар хоруйдаан тураллар:
— Төрөппүттэрбит үлэнэн ииппиттэрэ. Ийэбит Альбина Афанасьевна Андросова учуутал идэлээх. Моҕол ураһа хаппахчытын иэдэһин оҥорсубут норуот маастара. Аҕабыт Игнатий Поликарпович — Дьокуускайга гостехнадзор кылаабынай инженер-инспектора. Иккиэн Таатта улууһун Баайаҕатыттан төрүттээхтэр. Эбэбит Татьяна Игнатьевна Андросова, уруккута пионер-баһаатай, кыраайы үөрэтээччи, билигин 80 сааһын лаппа аастар да, кинигэ суруйар, дойдутун историятын, үтүө дьонун үйэтитэр. Кини биһиэхэ холобур буолар. Кыра эрдэхпитинэ, дьоммут Нерюнгрига көспүттэрэ. Биһиги онно улааппыппыт. Баайаҕаҕа сайылыырбыт, оттоон-мастаан, сир астаан, дьиэ өрөмүөннээн, күн аайы үлэлээн тахсарбыт. Күн ортотугар диэри утуйа сыппыппытын өйдөөбөппүт. Үлэ курдук, 7 чааска туруораллара. Олоххо бэлэмнээх буола улааппыппыт бэйэбитигэр абыраллаах. Ийэлээх аҕабыт өрүү өйөбүл, тирэх буолаллар, тапталларын сылааһа биһигини ыраахтан арчылыыр, араҥаччылыыр.
Дьэ, онон бу матырыйаал саҕалыныытыгар үөһэ баар сыылкаҕа https://30-under-30.forbes.ru/nominee/427291-micil-androsov киирэн, элбэҕи эрэннэрэр чаҕылхай ыччаппыт Мичил Андросовка куоластыаҕыҥ!.
- 0
- 0
- 0
- 0
- 0
- 0