Игорь кэпсииринэн түргэн тэтиминэн сайдан испит бизнес балаһыанньата билигин төрдүттэн уларыйда. Ол курдук, билигин бизнеһи интернет ситимин туһанан - онлайн тэрийэн үлэлиир эрэ кыах хаалла диир.

"Урбаанньыттар харантыын иннинэ ырыынакка урукку балаһыанньаны тутуһарга араас ньымалары булан туһаналларыгар тиэрдибитэ. Ол эрэн, маны учуоттаан да туран, хомойуох иһин, бородууктаттан, олох-дьаһах табаардарыттан ураты нэһилиэнньэ ортотугар араас өҥөнү туһанарга уонна да атын табаар атыылаһарга наадыйыы намтыыр. Итини таһынан балаһыанньаны солкуобай сыаната түһүүтэ уустугурдар. Бу түгэҥҥэ сотору кэминэн табаар себестоимоһыгар улахан охсуулаах буолара күүтүллэр. Ырынаакка хаалар туһуттан ороскуоту намтатыахха уонна күүскэ онлайн үлэлиэххэ наада. Дьиҥинэн, үгүс тэрилтэлэр бу ньымаҕа көспүттэрэ ыраатта. Аан дойду үрдүнэн хаһан да буолбатах ыарахан балаһыанньа үөскээтэ - бизнеһи быыһыыр эрэллээх механизмнары булар уустугурар", - диэн бэлиэтиир тэрилтэ салайааччыта. Ол эрэн Игорь санаатын түһэрбэт. Бизнес салгыы сайдар. 

"Ытыктабыллаах Сахам сирин олохтоохторун биһиги халандаарбытыгар дьоһун бэлиэ күнүнэн эҕэрдэлиибин! Бу күннэргэ аан дойду үрдүнэн дьиэҕэ олоруу эрэсиимин кэмигэр хас биирдиибит бигэ туруктаах дьиэ кэргэннээх уонна үтүө сыһыаннаах буоларбыт сүдү суолталааҕа билиннэ. Дьиэ кэргэн тулалыыр куһаҕан санаалартан арчылыыр, эбиитин хомойууттан быыһыыр кыахтаах", - диэн кини эҕэрдэтин ыытар.

Мантан салгыы Назаровтар дьиэ кэргэттэрин кытта кэпсэтиибин хатыылыыбын. Мин санаабар киһи туһаныан сөптөөх этиилэрэ, булугас санаалара бу хоруйдарга үгүс элбэх. Билсиҥ Назаровтар.

 “Минньигэс бизнес”. Дьоҕус урбаанынан дьарыктанар ыал" 

Бү күҥҥэ сөп түбэһиннэрэн “минньигэс бизнес” салайааччыларын кытта билиһиннэриэхпин баҕардым. @Ginger_rabbit_ykt инстаграмм страницатыгар эдэр бизнесменнэр суруйалларынан, дьоҕус хампаанньа бастакы үлэтин хардыыларын Дьокуускайга саҕалаабыта.  Билигин кинилэр физическэй сирэйдэри таһынан корпоративнай тэрилтэлэри кытта ыкса үлэлиир соҕотох хампаанньанан буолаллар. Маны таһынан, оҥорон таһаарбыт табаардарын Дьокуус­кай куорат маҕаһыыннарыгар уонна чугас эргин улуустарга атыылыыллар. Ити курдук “минньигэс бизнес” төрүттээччилэрэ Александра уонна Игорь Назаровтары кытта билсиэххэ, кыралаан кистэлэҥнэрин ыйыталаһыахха.

—    Эһиги олоххут кэрчиктэрин ааҕа, билсэ олорон  киһиэхэ араас элбэх боппуруостар үөскүүллэр. Мин билэрбинэн, иккиэн педагогическай үөрэхтээххит. Ол эрэн, эмискэ “Ginger Rabbit” бэкээринэ-кодитерскайы арынары санаммыккыт. Бурдук аһын оҥорон таһаарыытыгар эһиги хайдах тиийбиккитий?

Игорь: “Талбыт идэбитинэн биһиги үлэлиир сыалбыт суох этэ. Бастакытынан, бу дьыаланы саҕалааччы — Александра. Кини декреткэ олорон илиинэн ойууламмыт бирээнньиктэри буһаран  атыылыырга санаммыта. Кыра ду буоллар дьиэ кэргэҥҥэ эбии дохуот киирэр этэ”.

Александра: “Аҕыйах бириэмэ ааспытын кэннэ бурдук аһын буһарыыга Игорь көмөлөһөр буолбута. Ол саҕана, кини уопуттаах урбаанньыт буолан, бу дьарык  киниэхэ хоббига эрэ тэҥнээҕэ. Дьиҥэр, атыы-эргиэн эйгэтигэр Игорь уопута муҥура суоҕа”.

Игорь: “Оннук. Урбаанньыт эйгэтин бастакы хардыыларыгар элбэх сыыһа-халты тахсыбыта. Эбиитин дьиэ кэргэммиттэн быыстала суох тэйиччи сылдьарым. Тус бэйэм цифровой техниканы атыылыыр маҕаһыыным сабыллыбытын кэннэ сакааһынан дьиэлэринэн ас  илдьэн биэрэр сулууспатын үлэлэппитим, онтон дьахтар суумкаларын,  харчы мунньар иһитин, “Zippo” зажигалкалары, уо.д.а. табаардары атыылыырынан дьарыктанар этим. Онтум бириим да табыллыбатаҕа.

Александра: “Кэлин, хайдах эрэ иккиэн бииргэ үлэлиирбит ордук эбит диэн санааҕа кэлбиппит. Куруук бииргэ сылдьарбыт ордук курдуга. Миэхэ эмиэ бас­тайааннай клиеннэрдээх  бэйэ  дьоҕус структуралаах үлэлээх этим, ол эрэн киллэрэр барыһым кыра буолара. Бу кэннэ, Игорь, биһиги кыра хампаанньабытын сайыннарар туһунан сыалланан үлэни бэйэтигэр ылыммыта. Иккиэн көхтөөхтүк ылсан, кыра хампаанньа сайдыы стратегиятын оҥорон саҕалаабыппыт. Биллэн турар, саҥа арыллан эрэр тэрилтэ араас өрүттэрдээх. Бичиэнньэ, торт, бөрүөк буһаран дуу, эбэтэр кондитер табаардарын  аҕалан дуу, атыылыахха сөп этэ, уопсайынан, бизнес хайысхатын талар суол аартыгар  туруммуппут. Бүтэһигэр, бизнес араас өрүттэрин ыйааһыннаан, үөрэтэн көрөн баран, чааһынай сирэйдэри таһынан B2B сектор (работа бизнеса с бизнесом) диэки хайыс­халаах үлэлииргэ былааннаммыппыт. Игорь бастакы ыйдарга Дьокуускайдааҕы  100-тэн тахса тэрилтэни эрийэн кэпсэппитэ. Ол кэннэ, хас да хампаанньалары кытта дуогабар түһэрсэри ситиспитэ —  маҥнайгы хампаанньата  «Унция» чэй бутига,  оттон «Тортомастер» уонна «Для кондитеров» кондитердар маҕаһыыннара, ону таһынан  «Поярков» супермаркета. Ити курдук, куоракка кыралаан араас партнердар уонна клиеннэр баар буолбуттара. Ылан көрдөххө,  тохтоло суох биир кэм бородууксуйа хаачыстыбатыгар үлэлиирбит уонна үлэлиибит, ону таһынан сервискэ уонна түргэн тэтимнээх үлэлииргэ кыһаллабыт. Бу барыта кэлин норуокка киэҥ билиигэ  тахсыыга улахан суолталааҕа биллибитэ.

—    Мэлдьи, биир идэлээхтэрим интервью дьоруойдарыттан «Үрдүк ситиһиилэри хайдах ситиспиттэрин билээр! Кинилэр хайдах маннык бизнеһи арыммыттарай?» диэн ыйыталаһаар дииллэр. Үксүн хас биирдии киһи олоҕун кэрчиктэрин кэпсииригэр «Мин бастаан сыал туруоруммутум уонна ситиһэргэ иннин диэки хардыылаабытым» дииллэр. Баҕар, эһиги олоххут историята  атын буолаарай, кэпсиэххит дуо?

Игорь: “Боростуой­дук эттэххэ олус элбэхтик үлэлиибит (күлэр). Эбиитин билигин үрдүк ситиһиилэннибит диир эрдэ буолуо дии саныыбыт. Холобура, «Синет» эбэтэр  «Майтона» курдук улахан хампаанньалары ылан көрдөххө, сайдыы чыпчаала муҥура суох.  Биһиги хайа диэки улаа­тарга билигин сыалбытын чопчу билэбит. Дьоҥҥо туһалааҕы оҥоруохпутун, айыахпытын уонна түмүгэр инникитин ситиһиилэрбитинэн киэҥ туттуохпутун  баҕарабыт. Бэйэҥ сөбүлүүр уонна клиеннэргэ хаачыстыбалаах, үчүгэй табаары оҥорон таһаардахха киһи дуһаата үөрэр, дьоллонор курдук”.

Александра: “Маны таһы­нан, бэйэҕэр чопчу сыал туруорар улахан суолталаах. Манна холбуу, бэйэҥ уонна клиеннэргэ бизнескэ сыһыаныҥ суолтата муҥура суох. Кырдьыгынан, урбаан ис дьиҥэ — «Что посеешь, то и пожнёшь» дииллэрэ чахчы. Бу этии ханнык баҕарар идэҕэ барытыгар сөп түбэһэр. Ханнык баҕарар эйгэҕэ үрдүк чыпчааллары ситиһиэххэ сөп диэн ыччаттарга өйдөтүөхпүтүн баҕарабыт. Быраас, сварщик, повар эбэтэр инженер идэлээх буолбутун да иһин, үлэҕэ тапталынан сыһыаннастахха бастыҥнартан бастыҥ буолаҕыт.

Биһиги чуолаан трендтары уонна буолаары турар бырааһынньыктары болҕом­толоохтук кэтиибит. Холобура, буолаары турар иитэччи уонна учуутал күннэригэр анаан саайпытыгар дьон наадыйар табаардарын бэлэмнээбиппит.”