Билэрбит курдук, Уһук Илин уокуругун олохтоохторо салгын тырааныспарынан туох да эрэйэ-мэһэйэ суох удамыр сыанаҕа сылдьалларыгар анаан федеральнай бүддьүөттэн субсидия көрүллэрин Саха сирэ бастакынан туруорсубута. Уонна, киһи кыһыйыах, ол чэпчэтиинэн туһанар куораттар испииһэктэригэр Дьокуускайы киллэрбэтэхтэрэ.

Росавиация саайтыгар тахсыбыт испииһэккэ Дьокуускай субсидияттан сотуллубут төрүөтэ – бүддьүөт эбэһээтэлистибэтигэр лимииттэрэ, атыннык эттэххэ, үптэрэ-харчылара тиийбэтэх. Дьиҥэр, Дьокуускайыҥ диэн Арассыыйа Федерациятын саамай улахан иэннээх субъегын киин куората буоллаҕа эбээт. Манна 323 тыһыынчаттан тахса киһи олорор. Аны туран, улуустар үксүлэрэ соҕуруу Дьокуускай аэропордуттан көтөллөр.

Онон билигин да субсидиялаах билиэт иһин туруулаһабыт! Бастакы туруорсааччынан Ил Түмэн “Биир ньыгыл Арассыыйа” фракцията буолбута. Вице-спикер Антонина Григорьева салалтатынан, бу дьыл кулун тутар 11 күнүгэр баартыйа Генеральнай сэбиэтин сэкирэтээригэр, Федеральнай Мунньах Федерацияҕа Сэбиэтин бэрэссэдээтэлэ Андрей Турчак аатыгар, эбии харчы көрөллөрүгэр көрдөһөн, сурук ыыппыттара. Маныаха сурукка сүрүн тирэх оҥостубут докумуоннара – РФ Бырабыыталыстыбата 2018 сыл кулун тутар 2 күнүгэр 215-с №-дээх «Об утверждении Правил предоставления субсидий из федерального бюджета организациям воздушного транспорта в целях обеспечения доступности воздушных перевозок населению и о признании утратившими силу некоторых актов Правительства РФ» уурааҕар киирбит уларыйыылар. Ити уларыйыылар, сүрүннээн, Уһук Илик түөлбэтигэр салгын тырааныспарынан көтүү нэһилиэнньэҕэ табыгастаах буоларыгар туһаайыллыбыттара.

Госдума тырааныспарга уонна тутууга кэмитиэтэ суругу РФ Тырааныспарга министиэристибэтигэр аадырыстаабыта. Онуоха тустаах министиэристибэ РФ Бырабыыталыстыбатын I солбуйааччыта Андрей Белоусов кыттыылаах мунньахха бу суругу бэбиэскэҕэ туруоран, 2,5 млрд солк. үп эбии көрүллэрин, “Дьокуускай – Москва – Дьокуускай” уонна “Дьокуускай – Санкт-Петербург – Дьокуускай” хайысхалар субсидияланалларын ситиһэргэ эппиттэрэ. Мунньах  боротокуолугар олоҕуран, ити этиини РФ Бырабыыталыстыбатын көрүүтүгэр киллэрбиттэрэ.

Онон билигин өрөспүүбүлүкэбит РФ Тырааныспарга министиэристибэтин кытта дойду Бырабыыталыстыбатын резервнэй пуондатыттан авиа-билиэттэри субсидиялыырга үп көрдүүр.
  Атырдьах ыйын 4 күнүгэр СӨ Тырааныспарга уонна суол хаһаайыстыбатыгар миниистирэ Владимир Сивцев бу боппуруоһунан пресс-кэмпириэнсийэ ыытта.

-- Балаҕан ыйын 1 күнүттэн Дьокуускайтан Москваҕа уонна Санкт-Петербурга диэри бары категория гражданнарга субсидиялаах билиэти туруорсан, Росавиацияҕа уонна федеральнай минтранска сайаапка ыыттыбыт. Бу ый бүтүөр диэри биллиэхтээх.

Былырыын сайаапка биэрэрбитигэр, авиасалон 10%-на эрэ субсидиялаах билиэт буолуохтаах диэн этэ. Оттон билигин биһиги 40% буоларыгар туруорустубут. 

 «Якутия» уонна «Алроса» авиа-хампаанньалар чэпчэтиинэн туһанар дьоҥҥо (инбэлииттэргэ, биэнсийэлээхтэргэ, 23-гэр диэри саастаахтарга, элбэх оҕолоохторго) туһуламмыт субсидиялаах билиэттэрэ барыта былдьаһыгынан атыыланан номнуо бүппүт. Ол иһин ити сыалга эбии 700 мөл . солк. көрдөөтүбүт.

Аны туран, Аартыка олохтоохторун билиэттэрин субсидиялыырга саҥа бырагырааманы оҥордубут. Холобура, билигин хоту сир олохтоохторугар субсидиялаах билиэттэр дьыл уларыйар кэмигэр (күһүн, саас) эрэ атыыланаллар, ону даҕаны барыта холбоон 4500 эрэ пассажир онно тиксэр. Итинник буолуо суохтаах. Аны мантан ыла 13 арктическай оройуоҥҥа пропискалаах дьон сылы быһа субсидиялаах билиэтинэн туһанар буолуохтара. СӨ Бырабыыталыстыбатын Бэрэссэдээтэлэ Андрей Тарасенко бу бырайыагы өйөөтө. Субсидиялааһын саҥа механизма эһиилгиттэн үлэлиэҕэ. Дьэ, ол буолуо этэ – хотугу кыраай олохтоохторугар көдьүүстээх социальнай көмө, -- диэн былааннарын билиһиннэрдэ Владимир Михайлович.