Никита Греци кулун тутарга Саха сиригэр кэлэ сырыттаҕына кинини уонна Егор Петровиһы Ил Түмэн бастакы вице-спикерэ Александр Жирков  анаан көрсүбүтэ. Көрсүһүүгэ Александр Жирков Никита Грецигэ: «Россияттан Англияҕа эйигин кытта саха сылгытынан саха киһитэ айанныахтаах. Иккиэ буолан барыҥ», – диэн этии киллэрбитэ. Саха сириттэн бу айаҥҥа күүс-көмө буолуохпут диэн эрэннэрбитэ.

Англия айанньыта А.Н. Жирков этиитин ылынан, Европаҕа тэрийээччилэрин кытта сүбэлэһиэх буолбута. Сотору буолан баран кини Англияттан айаҥҥа саха сириттэн аргыстаах турунарга бэлэмин  туһунан биллэрбитэ.

Егор Петрович уонна Александр Жирков Англияҕа сылгыга үөрүйэх олохтоох саха киһитин  булан ыытарга сүбэлэспиттэрэ. Сотору Егор Макаров Өймөкөөнтөн Дугуйдаан Винокуров диэн эдэр сылгыһыты булан кэпсэппитэ.

Бэс ыйыгар Дугуйдаан Винокуров А.Н. Жирков ыҥырыытынан Дьокуускайга кэлэн, Е.П. Макаровы кытта Ил Түмэҥҥэ көрсүһүү буолбута. Сүбэлэһии түмүгэр бу айаҥҥа Саха сириттэн олохтоох сылгыһыты хайаан да тэрийэн ыытарга  быһаарыы ылыныллыбыта.

Дугуйдаан Винокуров өрөспүүбүлүкэ аатырбыт сылгыһыта Семен Львович Винокуров уола, оҕо эрдэҕиттэн сылгыга эриллэн улааппыт киһи. Никита Грецини кытта Егор Макаров билиһиннэрбитэ. Греци Өймөкөөҥҥө Үчүгэйгэ тиийэ сылдьыбыта. «Дугуйдаан – удьуор сылгыһыт, сытыы-хотуу, барыга-бары дэгиттэр, сыстаҕас, дьоҕурдаах. Англияҕа саха киһитин тэрийэн саха сылгытынан айанныыр туһунан Александр Николаевич этиитэ сөптөөх. Улахан суолталаах, кэскиллээх бырайыак үөскээн таҕыста. Өйөбүл улаатта. Билигин сэтинньи ыйтан айаҥҥа тэринии саҕаланан киирэн барыаҕа», – диир Егор Макаров.

Соторутааҕыта бу ыраах айан туһунан көҕүлүүр бөлөх сүбэ мунньаҕа буолла. Мунньахха Ил Түмэн бастакы вице-спикерэ континентан континеҥҥа атынан айаҥҥа Англия айанньытын кытта саха айанньытын кытыннарарга, өрөспүүбүлүкэҕэ бу айаҥҥа көмөлөһөр анал бөлөҕү тэрийэргэ этиилэри оҥордо. Мустубут дьоҥҥо туһаайан Александр Жирков: «Бу ыраах айан. Саха сылгытынан саха киһитэ бүтүн Россияны, Европаны уҥуордаан, Англияҕа, Лондоҥҥа тиийиэҕэ. Сырыы табылыннаҕына хотугу тыйыс дойдуга ханнык дьон  олорорун, туох дьарыктааҕын, саха норуотун, культуратын аан дойду бүтүннүүтэ атыннык көрүөҕэ. Бу айаны сүүһүнэн омук дьоно сэргиэ. Дьөһөгөй оҕотун тулуурун, күүһүн-уоҕун сөҕүө, олоҥхо дойдутун туһунан билиитэ кэҥиэ, ытыктабыла улаатыа. Англия айанньыта саха сылгытынан диэн буолбакка, саха айанньыта саха сылгытынан Англия айанньытын кытта бииргэ континентан континены уҥуордааһыннара биһиги норуоппутугар улахан суолталаах культурнай көстүү буолуоҕа», – диэтэ.

Александр Жирков этиитин тыа хаһаайыстыбатын миниистирэ А.П. Атласов, тас дойдулары кытта сыһыан миниистирэ Г.В. Кириллин, ону таһынан мунньахха кыттыбыт культура, экономика, туризм, эргиэн министиэристибэлэрин бэрэстэбиитэллэрэ, аграрнай университет салалтата өйөөтүлэр.

Билиҥҥи бигэргэтиллэ илик барылынан, атынан айан Россия биир уһугуттан – Магадантан саҕаланыаҕа. Салгыы Өймөкөөнүнэн Дьокуускайга кэлиэхтэрэ. Онтон Байкалынан, Алтайынан Москва нөҥүө түһэн, Европаҕа тахсыахтара.

Бу урукку өттүгэр ким даҕаны сорунан көрбөтөх сөҕүмэр айан уһуна 1500 көстөн ордук буолуоҕа. Лондоҥҥа тиийэн түмүктэниэҕэ. Александр Жирков эппитин курдук, сатаан дьаһаннахпытына бу айан Саха дойдутун, Саха олоҕун, Саха дьарыгын аан дойдуга туспатык көрдөрөр биир улахан суолталаах хамсаныы буолуоҕа. Сатаннар, табылыннар ханнык!