Бу күннэргэ РТРС 300-тэн тахса үлэһитигэр судаарыстыбаннай наҕарааданы аныыр туһунан РФ Бэрэсидьиэнэ Владимир Путин анал Ыйааҕа таҕыста.  Ол курдук, РТРС генеральнай дириэктэрэ  Андрей Романченко «Аҕа дойду туһугар үтүөлэрин иһин” III истиэпэннээх уордьанынан наҕараадаланна. Дойду араас эрэгийиэннэригэр баар  РТРС филиалларыгар таһаарыылаахтык үлэлии сылдьар 212 исписэлиис «Аҕа дойду туһугар үтүөлэрин иһин” I уонна II истиэпэннээх уордьаннарынан, 45 исписэлиис “РФ сибээһин уонна информациятын үтүөлээх үлэһитэ” аатынан наҕараадаланнылар.

Наҕараадаламмыттар ортолоругар Саха сириттэн эмиэ бааллар.  РТРС Саха сиринээҕи филиалын кылаабынай инженерэ Юрий Горчаков «РФ сибээһин уонна информациятын үтүөлээх үлэһитэ” аатынан, РТРС Саха сиринээҕи филиалын кылаабынай инженерин солбуйааччы  Виктор Паршин уонна  Нерюнгри куораттааҕы АПГ  сыаҕын сүрүннүүр инженерэ  Алексей Угаров “Аҕа дойду туһугар үтүөлэрин иһин” II истиэпэннээх уордьанынан наҕараадаланнылар.

Санатар буоллахха, РТРС аан дойду үрдүнэн  саамай улахан сыыппара телевидениетин ситимин олохтууру ситистэ. Билигин кини састаабыгар 5040 станция уонна 10080 анал биэрэр оборудованиелар (передатчиктар) бааллар. «2009-2018 сс. РФ телевидениенэн биэриини сайыннарыы” тус сыаллаах  бырагыраама чэрчитинэн,  85 эрэгийиэн федеральнай 20 ханаалы сыыппара форматынан көрөр кыахтанна.  Ити  эрэгийиэннэр ортолоругар Саха сирэ эмиэ баар.   Билигин 38 мөл. киһи хаачыстыбалаах телевидение өҥөтүн туһанар буолла.