Мин Варвара Алексеевна төрөппүт уолун Славаны кытта төлөпүөнүнэн кэпсэтэ сырыттым. Кини Крымҥа Молочное дэриэбинэҕэ үс сыллааҕыта көһөн олохсуйбут эбит. Ийэтэ кинилиин олорсубут. Миэхэ: “Ийэбин Симферополь аэропордугар сөмөлүөккэ киллэрэн олордубутум. Бэйэтэ олус бытааннык хаамар буолан, көлөөскөлөөх. Внуково аэропордун бэрэстэбиитэлэ көрсүөхтээх этэ. Ону умнан кэбиспиттэр”, -- диэн кэпсээтэ.
Онон кырдьаҕас киһи “утуйан хаалан сөмөлүөтүн куоттарбыт, муммут” буолбатах, аэропорт үлэһиттэрин дьалаҕайдарыттан сир-халлаан икки ардыгар олорон хаалбыт, умнуллубут. Слава этэринэн, ийэтэ 60 саастааҕар массыына саахалыгар түбэһэн, төбөтүн улаханнык эчэппиттээх эбит, сааһырбытыгар ол дьарҕата дьайан, умнуган буолбут буолуон сөп диэн сабаҕалыыр. Атын доруобуйата үчүгэй. Сэрии сылларынааҕы эрэйдээх оҕо сааһын туһунан төһө баҕарар кэпсиэн сөп үһү. Ийэлээх аҕата үлэ фронугар бараннар, оҕо дьиэтигэр иитиллэн улааппыт. Кини Уус Алдан Өнөрүттэн төрүттээх, Черноградскайдартан сыдьааннаах.
Варвара Алексеевна транспортнай полиция хоһугар баар, бүгүн киэһэ Дьокуускайга көтөөрү олорор. Саха Өрөспүүбүлүкэтин бастайааннай бэрэстэбиитэлистибэтин үлэһиттэрэ атаараллар. Дьокуускай аэропордугар сарсыарда 6 чааска бииргэ төрөөбүт балтылаах быраата көрсүөхтээхтэр. Хаҥалас Төхтүрүгэр балта Клавдия Алексеевналаахха олоруохтаах.
Слава – Варвара Алексеевна улахан оҕото. Магадаҥҥа пединститукка үөрэнэ сылдьан, Миллер Анатолий диэн еврейдиин билсэн, ыал буолбут. Ити 1972 сыллаахха Слава төрөөбүт. Онтон кэргэнэ, төрөппүттэрэ ыалдьаннар, Ленинградыгар барбыт уонна устунан хаалан хаалбыт. Сокуонунан арахсыбатахтар. Докумуоҥҥа суруллубут сокуоннай кэргэнэ кини эбит. Варвара Алексеевна кэлин бүрээт Владимир Тугутовтыын холбоһон, Сергей уонна Софья диэн оҕолордоммут. Уола Иркутскайга, кыыһа Санкт-Петербурга олохсуйбуттар.
- 0
- 0
- 0
- 0
- 0
- 0