Ол туһунан дойду вице-премьера Татьяна Голикова эпидемиологтары уонна вирусологтары кытары мунньахха иһитиннэрбит. “Владимир Путин тохсунньу 18 күнүттэн нэһилиэнньэҕэ күргүөмнээхтик быһыыны туруоруу үлэтин саҕалааҥ диэн сорук туруорда”, -- диэн эппит.

Санатар буоллахха, билиҥҥитэ икки вакцина рөгистрацияламмыт: “Спутник V” (Гамалеи киин)  уонна “ЭпиВакКорона” (“Вектор” киин). Үһүс вакцина Чумаков аатынан иммунобиологическай препараттары чинчийэр кииҥҥэ оҥорон таһаарыллыбыт уонна клиническэй боруобаны ааһар сылдьар.

Ааспыт сылга вакцинаны туруоруу бастакы түһүмэҕэ “кыһыл зонаҕа” үлэлии сылдьар уонна учууталларга биэрииттэн саҕаламмыт.  Саха сиригэр тохсунньу 17 күнүнээҕи туругунан, өрөспүүбүлүкэҕэ коронавирустан быһыыны уопсайа 2203 киһи ылбыт. Бу туһунан бэйэтин Telegram-ханаалыгар өрөспүүбүлүкэтээҕи суһал штаб салайааччытын солбуйааччы Ольга Балабкина иһитиннэрбит. Маны таһынан ревакцинацияны 574 киһи ааспыт. Бү күннэргэ быһыы Аммаҕа, Үөһээ Бүлүүгэ, Бүлүүгэ, Горнайга, Мэҥэ Хаҥаласка, Миирнэйгэ, Намҥа, Ньурбаҕа, Сунтаарга, Тааттаҕа, Уус Алдаҥҥа, Хаҥаласка уонна Чурапчыга оҥоһуллар.

Сарсыҥҥыттан коронавирустан быһыыны Дьокуускай куорат ханнык баҕарар поликлиникатыгар ылыахха сөп. Ол инниттэн кол-кииҥҥэ эбэтэр поликлиника регистратуратыгар эрдэттэн суруттарыахха наадатын доруобуйаҕа харыстабыл министиэристибэтэ иһитиннэрэр.  Быһыыны биэрии туһунан интэриэһиргиир ыйытыылары СӨ доруобуйаҕа харыстабылын министиэристибэтин “итии линиятын” 8-800-100-14-03 төлөпүөнүнэн нүөмэригэр эрийэн ыйытыахха сөп.