Дьокуускай куорат дьаһалтата «Тыыннаах буолалларыгар көмөлөс» аһымал тэрилтэҕэ хаһаайына суох ыттары тутарга, эбии вольердары оҥорорго көмөлөһүөҕэ диэн куорат дьаһалтатын пресс-сулууспата иһитиннэрэр.
Дьэллик ыттары тутар пуун дириэктэрэ, «Тыыннаах буолалларыгар көмөлөс» аһымал пуонда салайааччыта Екатерина Безрученко эппитинэн, пууҥҥа баар ыттар олорор усулуобуйаларын тупсарыахтаахтар. «Эбии вольердары тутуохпут, ыттары тутарбытыгар массыына атыылаһыахпыт», -- диэн эттэ.
Пууҥҥа аҕалыллыбыт ыттартан кырыктаах ыттары төттөрү ыыппаттар. Дириэктэр Екатерина Безрученко этэринэн, дьону ордук көрүүтэ-истиитэ суох сылдьар хаһаайыннаах ыттар ытыраллар.
2019 сыл сэтинньи ыйыттан 2020 сыл олунньу ыйыгар диэри 130 киһи ыкка ытыттарбыт. Ол онтон 71-рэ хаһаайыннаах буолаллара биллибит. 2020 сэтинньи ыйыттан 2021 сыл олунньу ыйыгар диэри 135 киһи ыкка ытыттарбыт, 72 ыт хаһаайынын быһаарбыттар.
Дьокуускай куорат бэйдиэ сылдьар ыттары тутар пуунугар кулун тутар 1 күннээҕи туругунан 209 ыт баар. Бу нэдиэлэҕэ 142 ыты төттөрү ыыталлар. Федеральнай сокуон оннук дьаһалы ирдиир.
2020 сыл устата 2322 бэйдиэ сылдьар дьиэ кыылын тутан пууҥҥа аҕалбыттар. 1172 кыылы төрөөбөт-ууһаабат оҥорбуттар, 1056 дьиэ кыылыгар чума, иирии ыарыыларыттан быһыы туруорбуттар, 1606 кыылы маркировкалаабыттар, 628 дьиэ кыылын хаһаайыннарын булбуттар уонна атын илиигэ биэрбиттэ, 788 ыт төттөрү ыытыллыбыт.
-
0
-
0
-
0
-
0
-
0
-
0
