Үөрүүлээх тэрээһиҥҥэ СӨ Бырабыыталыстыбатын Бэрэссэдээтэлин солбуйааччы Сергей Местников,  Ил Түмэн Бэрэссэдээтэлэ Петр Гоголев,  Ил Түмэн наукаҕа, үөрэххэ, култуураҕа, маассабай иһитиннэриилэри тарҕатар сириэстибэлэргэ сис кэмитиэтин бэрэссэдээтэлэ Феодосия Габышева, СО РАН Саха сиринээҕи научнай киинин бэрэссэдээтэлэ Михаил Лебедев,  СӨ Үөрэҕин миниистирэ  Михаил Сивцев уо.да.а. кытыннылар.

Мемориальнай дуосканы аһыы кэмигэр академик Александр Сергеев: «Хайа баҕарар кэмҥэ науканы оҥорорго туспа анал ньымалар туһаныллаллар. Арассыыйа курдук киэҥ-куоҥ сири арыйыыга улахан болҕомто күүскэ ууруллубута.  Биһиги ити айылаах нэлэмэн сири-уоту арыйыыга  ис сүрэхтэриттэн күүскэ ылсан үлэлээбит учуонайдары бары билэбит, өйдүүбүт, кинилэринэн киэн туттабыт. Биһиги бүгүн наука өссө иннин диэки кимиилээхтик хардыылыsрын туһугар муһуннубут, онно аналлаах мунньахтарга кыттыахпыт», - диэн эҕэрдэ тылыгар эттэ.

Ил Түмэн спикерэ Петр Гоголев «Биһиги бүгүн наука устуоруйатын кэриэстиибит, саныыбыт. Тоҕо диэтэххэ, устуоруйа биһиги ортобутуттан улуу дойду патриоттарын таһаарар аналлаах. Гений Михаил Ломоносов Улуу Сибиир эспэдииссэйэлэрин оруолларын туһунан «Ханнык баҕарар баҕа санааны ситиһэргэ, толорорго сүрүн акылааты түһэрэн үтүө холобур буоллулар” диэн эппитэ. Биһиги улуу учуонай “Арассыыйа Сибиир уонна  Хотугу муустаах акыйаанынан күүһүрүө...”, - диэн бэргэн, сытыы этиитин бары билэбит, өйдүүбүт.  Бу тыллары олоххо дьиҥнээхтик киллэриигэ саха дьонун элбэх көлүөнэтэ кыттыыны ылбыта», - диэн эттэ. Спикер Петр Гоголев  Саха АССР тэриллибитэ 100 сылын көрсө  диэн  Д.К.Сивцев-Суорун Омоллоон аатынан Чөркөөхтөөҕү мусуой базатыгар олоҕуран, «Саха сирэ – Уһук Илин тирэҕэ” диэн бырайыак чэрчитинэн,  «Пути великих совершений» диэн бырайыак (ааптар Георгий Никинов)  Саха сирин үрдүнэн күүскэ тарҕанан эрэрин туһунан иһитиннэрдэ.

Академик Александр Сергеев Ил Дархан Айсен Николаевы кытта көрсөн, фундаментальнай наука сайдыытын уонна научнай түмсүүлэр геологическай чинчийиилэргэ кыттыахтаахтарын туһунан кэпсэттэ. Айсен Николаев: «Анаан-минээн Саха сиригэр кэлбиккэр махтанабын. Арассыыйа  наукаларын бэрэсидьиэнэ  Саха сиригэр 25  сыл буолан баран кэлбитин туһунан иһитиннэрбиттэрэ. Ол эбэтэр  1996 сыллаахха Саха сиригэр кэлэн барбыт. Ол иһин, Саха сирин наукатын уопсастыбаннаһа сүргэтэ олус көтөҕүлүннэ. Онон бу сырыы  өрөспүүбүлүкэ наукатын тэрилтэлэригэр саҥа саҕахтары, былааннары биэриэ диэн эрэнэбин», - диэн эттэ.

Бүгүн эбиэн кэннэ Александр Сергеев Арассыыйа наукаларын академиятын Сибиирдээҕи салаатын Саха сиринээҕи наука киинин, Алмаас геологиятын, Ирбэт тоҥу чинчийэр, Мэдиссиинискэй кыһалҕалар институттарын салалталарын кытта көрсүһүүгэ сылдьыаҕа.

Оттон сарсын, кулун тутар 18 күнүгэр, Александр Сергеев Саха сирин уонна Красноярскай кыраай Аартыкатааҕы сирдэрин-уоттарын боппуруостарыгар аналлаах, итини тэҥэ, 2021-2030 сылларга наука уонна технология сайдыытын «төгүрүк остуолугар» кыттыаҕа.  Өйүүн, кулун тутар 19 күнүгэр, Тиксиигэ көтүөҕэ. Онно Ю.Г.Шафер аатынан Космофизика институтун Хотугу геокосмофизическэй обсерваториятыгар, тыал көмөтүнэн үлэлиир комплекска сылдьыаҕа.