Издательский дом Редакция Подписка
Погода в Якутске: . 24 oC
КУРС ЦБ: $ 74,30 | 88,17

Госдума саайтыгар ийэ хапытаалын туһаныы бэрээдэгэ судургутуйбутун туһунан иһитиннэрии таҕыста. Онон ийэ хапытаалын ханнык түгэҥҥэ туһаныахха сөбүн туһунан сиһилии сырдатабыт.

Госдума саайтыгар ийэ хапытаалын туһаныы бэрээдэгэ судургутуйбутун туһунан иһитиннэрии таҕыста. Онон ийэ хапытаалын ханнык түгэҥҥэ туһаныахха сөбүн туһунан сиһилии сырдатабыт.

Оҕо үөрэҕин төлөбүрүгэр туһаныы

Ийэ хапытаалынан дьиэ кэргэн ханнык баҕарар оҕотун үөрэҕин төлүөн сөп. Ол эбэтэр сэртипикээттээх эрэ оҕо туһанара ирдэммэт. Ону таһынан, хас да оҕо үөрэҕин төлөбүрүгэр эмиэ туһаныахха сөп.

Арассыыйа ыаллара ийэ хапытаалын уһуйаантан саҕалаан үрдүк үөрэх кыһатын төлөбүрүгэр тиийэ туттар бырааптаахтар. Ол иһигэр устудьуон оҕо уопсайга олорор төлөбүрэ эмиэ киирэр. Оҕо үөрэҕин төлөбүрүгэр ыытарга, сэртипикээттээх оҕо 3 сааһын толору туолбут, итиэннэ үөрэххэ киирэр оҕо 25-тэн кыра саастаах буолуохтаах. Маныаха уһуйаан төлөбүрүгэр оҕо төрөөбүтүн кэннэ тута туһанар көҥүллэнэр. Ол гынан баран, төлөбүрү ылар тэрилтэ хайаан даҕаны РФ иһигэр баар уонна үөрэх өҥөлөрүн оҥорорун туһунан лиссиэнсийэлээх буолуохтаах.

Ийэ хапытаалын үөрэх төлөбүрүгэр туһаныан баҕалаахтар сайабылыанньа суруйаллар уонна үөрэх тэрилтэтин (уһуйааны) кытта түһэрсибит дуогабардарын куопуйатын аҕалаллар. Устудьуон уопсайын төлөбүрүгэр туһанарга куортам суумата уонна болдьоҕо ыйыллыбыт дуогабар, оҕо уопсайга олорорун туһунан үөрэх тэрилтэтин ыспыраапката уонна пааспар ирдэнэллэр.

Ипотека төлөбүрүгэр туһаныы

Ийэ хапытаалын көмөтүнэн олорор усулуобуйаны оҕо 3 сааһын туолбутун кэннэ тупсарар көҥүллэнэр. Оттон ипотека сүрүн иэһин сабарга эбэтэр бастакы усунуоһун оҥорорго төрөөбүтүн кэннэ тута туттуохха сөп.

Ипотека иэһин сабарга киһи ипотекалааҕын туһунан баантан ыспыраапка ылар. Ону сэргэ атыылаһыллар дьиэ-уот дьиэ кэргэн бары чилиэннэрин уопсай бас билиилэрэ буоларын туоһулуур нотариальнай эбэһээтэлистибэ оҥорторор. Маныаха хас да куопуйаны оҥорторор ордук. Тоҕо диэтэххэ, ипотека иэһэ сабыллыбытын кэннэ, маннык эбэһээтэлистибэ дьиэ кэргэн хас биирдии чилиэнин өлүүтүн оҥорторорго эмиэ ирдэнэр. Бу кэннэ сайабылыанньаны биэнсийэ пуондатын салаатыгар, элбэх өҥөлөөх кииҥҥэ (МФЦ-га) эбэтэр Госуслуги порталга биэриэххэ сөп. Ирдэниллэр докумуоннар испиэһэктэрэ бүтүннүү Госуслуги порталга ыйанан турар. Биэнсийэ пуондата сайабылыанньаны 1 ый иһинэн көрөр. Өскөтүн аккаас кэллэҕинэ, биэнсийэ пуондатыгар хаттаан сайабылыанньа суруйуохха сөп.

Өскөтүн ийэ хапытаалын көмөтүнэн ипотека бастакы усунуоһун төлүөххүтүн баҕарар буоллаххытына, ипотека ыларга биэрэр сайабылыанньаҕытыгар ол туһунан булгуччу ыйаҕыт. Ону таһынан биэнсийэ пуондатыттан ийэ хапытаала туһаныллыбатаҕын туһунан ыспыраапка ылаҕыт. Бу кэннэ үүт-үкчү ипотеканы ийэ хапытаалынан сабыы хардыыларын оҥороҕут (үөһэ ааҕыҥ).

Арассыыйа Федерациятын Бырабыыталыстыбатын саҥа уурааҕынан, өскөтүн ийэ хапытаала дьиэ-уот тутуутугар эбэтэр саҥардыллан оҥоһуутугар туттуллубут буоллаҕына, биэнсийэ пуондатыгар тутуу үлэлэрэ түмүктэммиттэрин туоһулуур аакталары туттарар ирдэммэт буолла. Ол оннугар Росреестртан сир учаастага уонна онно турар дьиэ кэтэх бас билиигэ сылдьарын туһунан быыпыска оҥортороҕут. Манна бэлиэтээн эттэххэ, кыбартыыра өрөмүөнэ олорор усулуобуйаны тупсарыыга киирбэт. Ону сэргэ, ийэ хапытаалынан хаарбах туруктаах эбэтэр көтүрүллэр дьиэни-уоту атыылаһар көҥүллэммэт.

Ийэ биэнсийэтигэр туһаныы

Ийэ хапытаала бүтүннүү эбэтэр өлүүлээн ийэ биэнсийэтин мунньуллар чааһыгар туттуллуон сөп. Оччоҕо салайар хампаанньа эбэтэр судаарыстыбаннайа суох биэнсийэ пуондатын итэҕэллээх салалтатыгар киирэр. Ол гынан баран, Госдума 2020 сыл сэтинньи ыйыгар саҥа сокуону ылыммыта. Онон дьахтар бэйэтин баҕатынан биэнсийэ мунньуллар чааһыгар барбыт хапытаалын төнүннэриэн уонна атын сыалга туттуон сөп. Ити кэннэ киниэхэ сыл аҥаара бэриллэр. Бу кэм иһигэр кини хапытаалын туттуохтаах. Өскөтүн туттубат буоллаҕына, хаттаан сыл аҥаарыгар уһаттарарын туһунан сайабылыанньа суруйар.

Инбэлиит оҕо социальнай үөрэҕэр (реабилитациятыгар) туһаныы

Ийэ хапытаала инбэлиит оҕо социальнай үөрэҕи (реабилитацияны) ааһарыгар уонна уопсастыбаҕа үөрэнэригэр туттуллар табаардар эбэтэр өҥөлөр төлөбүрдэригэр ороскуоттаныан сөп. Ол гынан баран, федеральнай бүддьүөттэн үбүлэнэр мэдиссиинэ, реабилитация өҥөлөрүн төлөбүрүгэр туттар көҥүллэммэт.

Ыйдааҕы төлөбүр быһыытынан туһаныы

Өскөтүн дьиэ кэргэҥҥэ 2018 сыл тохсунньу 1 күнүн кэннэ иккис оҕо төрөөбүт (эбэтэр иитиллэ ылыллыбыт), итиэннэ дьиэ кэргэн орто дохуота тиийинэн олоруу икки алын кээмэйиттэн намыһах буоллаҕына, бу ыалга 3 сыл устата ый аайы оҕо тиийинэн олоруутун алын кээмэйэ төлөнөр. Бу курдук, ийэ хапытаалын хас да хайысханан туһаныахха сөп. Ол гынан баран, ийэ хапытаала хаһан да уу харчынан бэриллибэтин өйдөөҥ.

2007 сыллаахха ыаллар аан бастакы ийэ хапытаалын ылбыттара. Оччолорго суумата 250 тыһ. солк. тэҥнэспитэ. Билигин 639 432 солк. буолла. Ийэ хапытаала олоххо киирбитин кэннэ 10 сыл устата Арассыыйаҕа 1 8241230 оҕо төрөөбүт. Бу 1992-2006 сс. көрдөрүүнү 2 кэриҥэ төгүл куоһарар.

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ