СӨ Үөрэҕин министиэристибэтэ бу боппуруоска туспа мунньахтаабыта. Төһө да уустук балаһыанньа турбутун иһин оҕо эбии үөрэҕэ эмиэ тохтуо суохтаах диэн быһаарыы ылыллан, билигин үгүс куруһуоктар баар бары ньыма көмөлөрүнэн ыытыллаллар.

Оҕолор  дьиэлэригэр эт-хаан өттүнэн дьарыктаныахтаахтар 

Яков Гаврильев, СӨ Спорка үрдүкү маастарыстыбатын оскуолатын тхэквандоҕа ыстаарсай тириэньэрэ:

- СӨ Спорка уонна физическэй култуураҕа министиэристибэтин бирикээһинэн эрчиллэргэ аналлаах  эрэкэмэндээссийэлиир былааннары оҥорбуппут. Оҕолор дьиэҕэ олорон эрэ эт-хаан  өттүнэн эрчиллиилээх буолалларыгар сөптөөх хамсаныылары оҥороллорун, ону кэмнээн дьарыктаналларын ситиһиэхтээхпит. Уопсай эрэкэмэндээссийэлэри таһынан биирдиилээн тириэньэрдэр  эмиэ былаан оҥорон ыыталлар. Оҕолор дьиэлэригэр ону көрөн дьарыктаналлар. Биллэн турар, саалаҕа дьарыктанар курдук буолбатах, тириэньэри кытта ыкса дьарыктаныыга  тиийбэтэ өйдөнөр.  Ол эрээри, эт-хаан оҥоро үөрэммит эрчиллиилэрин умнуо суохтаах. Дьиэҕэ өр хамсаммакка олорууттан гиподинамия  үөскүөн сөп. Хас биирдии тириэньэргэ оҕо дьарыктаммытын туоһулаан хаартыскаҕа түһэрэн оччуоттуур. Инстаграмҥа Арассыыйа сүүмэрдиир хамаандалара онлайн дьарыктары ыыталлар. Москва бириэмэтинэн буолан, үксүн киэһэ өттүгэр да буоллар, сорох оҕолор ону көрөн эмиэ эрчиллэллэр. Билигин тириэньэрдэрим үлэлэрин хонтуруоллуубун, сборнайга баар оҕолорум отчуот ыыталлар.  Кырачаан эрчиллээччилэрим нэдиэлэтээҕи сорудаҕы толорбуттарын видеоҕа  устан ыытан  отчуоттууллар.

Ыраахтан үөрэнии уонна үөрэтии саҥа ньыма буолаллар

Дьулустан Осипов, Дьокуускайдааҕы Алтан IT-оскуола салайааччыта:

- Арассыыйа  үрдүнэн ыраахтан үөрэтиигэ көстүбүт. Алтан IT-оскуола  бэлиэр кулун тутар 23 күнүттэн үөрэнээччилэрин ыраахтан үөрэтэн саҕалаабыта.  Биллэн турар, итинник үөрэтии ураты ньымалаах, ирдэбиллээх. Методистарбыт нэдиэлэҕэ иккитэ программированиены үөрэтэр видеоуроктары бэлэмнээн үөрэнээччилэргэ ыыталлар.  Салгыы учууталлар  хас биирдии оҕону кытта сибээстэһэн консультация биэрэллэр. Маннык хабааннаах үөрэтэр ньыма олус табыгастаах.  Тоҕо диэтэххэ, оҕо талбыт кэмигэр ол уроктары көрүөн уонна баҕардаҕына хатылыан сөп. Уруоктарбыт барыта сайтпытыгар угуллан тураллар.  Каникул бүппүтүгэр сүрүн оскуолаларга ыраахтан үөрэтиини саҕалаатылар.  Ол иһин үөрэнээччилэрбит иллэҥ кэмнэрэ биллэрдик аччаата.  Оҕоҕо  уонна учууталга ыраахтан үөрэнии, үөрэтии саҥа ньыма буолар.  Ол иһин үөрэтии улахан ыххайыыта суох барыахтаах дии саныыбын.