Бу фестиваль СӨ Бырабыыталыстыбатын уонна "Синергия" корпорация иккиэн кыттыгас бырайыактара буолар.
- СӨ Бырабыыталыстыбатын Бэрэссэдээтэлэ Андрей Тарасенко быһа эфиргэ Антон Комоловка ыалдьыттаата.
Бу икки күн иһигэр айар-тутар баҕалаах ыччат “Молодой бизнес”, “Кинематограф и искусство”, “Мультипликация и анимация”, “Музыка Якутии”, "Танцевальный квартал”, “Digital и IT”, “Спорт”, “Киберспорт”, “Якутия travel”, “Журналистика и блогинг” диэн хайысхаларынан маастар-кылаастарга, биллэр дьоннуун көрсүһүүлэргэ сылдьаллар, куонкурустарга күрэхтэһэллэр.
Фестивальга анаан хаҥкыга Олимпиада чөмпүйүөнэ Алина Загитова кэлэ сылдьар. “Эллэй Боотур” муус дыбарыаска маастар-кылаас ыытта. Арассыыйа эстрадатын ырыаһыта Леван Горозия кэнсиэрэ буолуохтаах. “Comedy club” резиденэ Михаил Галустян дьоро түгэни ыытааччы быһыытынан киэргэттэ. Киинэ артыыһа Михаил Башкатов айар ыччаты кытта көрүстэ, актер маастарыстыбатыгар сүбэлэри биэрдэ.
Түмүктүүр чааһа “Өрөгөй” спорт комплексыгар буола турар. Быһа эфири 90-с сыллартан биллэр ыытааччы Антон Комолов кэлэн ыыта олороро фестивалы өссө үрдүк таһымнаата.
Ил Дархан Айсен Николаев айар-тутар баҕалаах ыччаты кэлэн эҕэрдэлээтэ.
Кини: “Бу фестиваль пандемия кэнниттэн Арассыыйаҕа даҕаны, бука, ыччакка аналлаах бастакы улахан тэрээһин буолуо. Маны ситиһиилээхтик түмүктээтэхпитинэ, эһиил өссө тэрийэр туһунан толкуйдуохпут”, -- диэн кэрэспэдьиэҥҥэ хоруйдаата.
Рэпердэри, ди-джейдэри, блогердары, роботехниктары, хомусчуттары, программистары, киберспортсменнары, туризмынан дьарыктанааччылары, мультик оҥорооччулары, эдэр бизнесменнэри, худуоһунньуктары, үҥкүүһүттэри, ырыаһыттары, артыыстары, спортсменнары – барыларын түмпүт бу бэртээхэй фестиваль саҥа талааннары арыйдын, үрдүкккэ кынаттаатын!
- 0
- 0
- 0
- 0
- 0
- 0