Устуоруйа кэрэһилииринэн, 1921 сыл ахсынньы 28 күнүгэр аан бастакы сахалыы тыллаах “Манчаары” хаһыат күн сирин көрбүт. Күн бүгүн саха бастакы хаһыатын үтүө үгэстэрин “Саха сирэ” уонна “Кыым” норуот хаһыатын кэлэктииптэрэ утумнууллар. Онон Ил Дархан Айсен Николаев 2021 сыл кулун тутар 17 күнүнээҕи 90-РГ №-дээх дьаһалынан, өрөспүүбүлүкэ 2021 сыллаах сүрүн тэрээһиннэрин былааныгар – сахалыы тыллаах бастакы хаһыат 100 сыллаах үбүлүөйүн үрдүк таһымнаахтык бэлиэтиири киллэрбитэ. Ону сэргэ үбүлүөйү тэрийэр анал хамыыһыйа састааба бигэргэммитэ.

Сахалыы тыллаах бастакы хаһыат 100 сыллаах үбүлүйүөн тэрээһинигэр бэлэмнэнии үлэлэрин кытта СӨ Инновацияҕа, сыыппара сайдыытыгар уонна инфокоммуникационнай технологияларга миниистирэ Анатолий Семенов билиһиннэрдэ.

Ол курдук, 2021 сыл устата үбүлүөйгэ аналлаах тэлэбиидэнньэ биэриилэрэ, анал ыстатыйалар, киинэлэр, кинигэлэр тахсыылара, быыстапкалар, атын эрэгийиэн иһитиннэриилэри киэҥник тарҕатар сириэстибэлэрэ кыттыылаах тематическай пресс-кэмпириэнсийэлэр, кэнсиэрдэр, суруналыыстыка бэтэрээннэрин Нам улууһун Хатырык сэлиэнньэтигэр Судаарыстыбаннай түмэлигэр пресс-десаннара былааннаммыттар. Үбүлүөй сүрүн бырааһынньыктааҕы тэрээһинэ от ыйыгар – Национальнай бэчээт күнүгэр –  буолар. Маны таһынан, “Печатный двор Якутии-2021” диэн XI эрэгийиэннэр икки ардыларынааҕы быыстапка-дьаарбаҥка былааҥҥа киирбит. Саха суруналыыстыкатын үбүлүөйдээх тэрээһиннэрэ бу сыл ахсынньы ыйыгар дьоро киэһэнэн түмүктэнэллэрэ күүтүллэр.

Вице-премьер Сергей Местников сахалыы тыллаах бастакы хаһыат 100 сыллаах үбүлүөйүгэр өрөспүүбүлүкэ бары иһитиннэриилэри киэҥник тарҕатар сириэстибэлэрэ бииргэ сомоҕолоһон тэрээһини үрдүк таһымнаахтык ыыталларыгар ыҥырда. Вице-премьер мунньахха этиллибит санаалары учуоттаан, үбүлүөй былаанын бигэргэтэргэ сорудахтаата.

СӨ Ил Дарханын уонна Бырабыыталыстыбатын пресс-сулууспатын матырыйаалынан.