РФ Роспотребнадзорун салайааччыта Анна Попова дойдуга эпидемиологическай балаһыанньа эмискэ уустугурбутунан, дойду Бэрэсидьиэниттэн Маай бырааһынньыктарын 10 күн уһатарга этии киллэрдэ. Кини этэринэн, Маай бырааһынньыктарыгар үгэс курдук дьон элбэхтик төттөрү-таары айанныыр. Онон бырааһынньык уһаатаҕына, дьон сырыыта аҕыйыахтаах. Ол эбэтэр сынньана тиийбит дьон биир сиргэ уһуннук олорор, аҕыйахтык кэлэр-барар кыахтаналлар.
Владимир Путин “COVID-19 ыарыыны утары охсуһар исписэлиистэр санаалара хайаан да болҕомтоҕо ылыллыахтаах” диэтэ. Онон тустаах ыйаахха илии баттаата. Инньэ гынан Арассыыйа олохтоохторугар ыам ыйын 4, 5, 6 уонна 7 күннэрэ эбии сынньалаҥ күннэринэн биллэрилиннилэр. Маныаха хамнас сарбыллыбат. Онон, ыам ыйын 1 күнүттэн 10 күнүгэр диэри супту өрүүбүт.
- 0
- 0
- 0
- 0
- 0
- 0