Ил Дархан өрөспүүбүлүкэҕэ балаһыанньа тыҥаабытын, вируһунан ыалдьар дьон ахсаана элбээн иһэрин туһунан эттэ. Ол курдук, “Газпром” Чайыҥдатааҕы гааһы хостуур сиригэр 23 киһи ыалдьыбыт.  Ленскэй балыыһатыгар 11 киһи ыалдьан сытар.  Дьокуускай балыыһатыгар  22 киһи, Алдаҥҥа 41 киһи эмтэнэллэр.

“Марха микро-оройуонугар олорор ыалдьыбыт дьахтары кытта хантаактаспыт дьонтон 7 киһи анаалыһа ыалдьыбыттарын көрдөрбүт. Дьахтар бэйэтэ ыарахан туруктаах. Дьиэҕэ олоруу эрэсиимин тутуспаттан бу курдук түбэлтэлэр тахсаллар”, - диэн Айсен Николаев эттэ. Ил Дархан ханнык миэрэлэр ылыллалларын туһунан иһитиннэрии оҥордо. Марха микро-оройуонугар олорор ыалдьыбыт дьахтар билсибит биир киһитинэн Дьокуускай перинатальнай киинин алын сүһүөҕүн үлэһитэ буолар. Киин үлэһиттэриттэн анаалыстар ылыллыбыттар. Алдаҥҥа сүүс кэриҥэ киһиттэн анаалыс ылыллыбыт, онтон биир киһи анаалыһа вирустааҕа биллибит. Алдаҥҥа ыарыы үүнэ-тэһиинэ суох тарҕаныытын утары үлэ ыытыллан, балаһыанньа хонтуруолга ылыллыбытын туһунан Айсен Николаев иһитиннэрдэ. Чайыҥдатааҕы гааһы хостуур сиргэ Ноябрьскайтан мэдиссиинэ үлэһиттэрэ көмөҕө кэлбиттэр. Санкт-Петербургтан эмтээх уонна мэдиссиинэ үлэһиттэрдээх анал сөмөлүөт кэлиэхтээх.  Ону кытта Роспотребнадзор уонна Ыксаллаах быһыыга-майгыга министиэристибэтин Саха сиринээҕи салааларын үлэһиттэрэ уонна Доруобуйа харыстабылын министиэристибэтин биригээдэтэ тиийэннэр үлэлээн эрэллэр.  Айсен Николаев ыарыы тарҕамматын туһугар дьиэҕэ олоруу эрэсиимэ кытаанахтык тутуһуллуохтааҕын өссө төгүл тоһоҕолоон бэлиэтээтэ.