Елена Водовозова, Дьокуускай куорат олохтооҕо: «Сыана үрдээбитэ адьас сыыһа. Дьон киин куораттарга сынньана эрэ буолбакка, эмтэнэ, үөрэнэ бараллар».

Яна Гладких, Дьокуускай куорат олохтооҕо: «Биһиги  арыыланан баран, ханна да айанныыр кыаҕа суох буолан олоробут.  Сыана үрдээбитэ адьас өйдөммөт».

Холобур, билигин 4 киһилээх дьиэ кэргэн  Дьокуускайтан Сочига кэлэ-бара, ортотунан, 250 тыһ. солк. төлүүр буолбут. Оттон дойдубут тэбэр сүрэҕэр -- Москваҕа  итинник састааптаах дьиэ кэргэн кэлэригэр-барарыгар 200 тыһ. солк. төлүөн наада.

Алена Федорова  Федеральной антимонопольнай сулууспа  аадырыһыгар сурук суруйбут уонна онно икки күн иһигэр  800-тэн тахса киһи илии баттаабыт.  Алена Федорова,  Дьокуускай куорат олохтооҕо: «Сайыҥҥы кэмҥэ уонна Саҥа дьыллааҕы уһун сынньалаҥҥа  билиэт сыаната куруук үрдээччи. Ол эрээри, быйыл сыана үс төгүл үрдээтэ».

СӨ Тырааныспарга министиэристибэтэ иһитиннэрбитинэн, быйыл субсидиялаах билиэт көрүллүбүт эрээри,  атыыга хайыы-үйэ баран бүппүт. СӨ Тырааныспарга министиэристибэтин салгын тырааныспарыгар департаменын салайааччы  Виктор Тарабукин: «Эрэгийиэннээҕи көтөр ааллар саҥалар буолбатахтар, эргэлэр. Ол иһин,  сайыҥҥы кэмҥэ көтөллөрүгэр элбэх үп-харчы наада», -- диэн эппиэттээбит. Бу  кыһалҕаны быһаарыыга СӨ Ил Түмэнэ эмиэ кыттыспыт.

Ил Түмэн Бэрэссэдээтэлэ Петр Гоголев: «Тырааныспар министиэристибэтэ РФ Федерациятын Сэбиэтигэр иһитиннэрбит, онон ити боппуруос хонтуруолга ылыллыбыт. Эбии 2,6 млрд. солк. көрүллүбүт, ити үп тустаах  маршруттарга көтүүгэ туһаныллыаҕа», -- диэн эппит. Спикер быһаарбытынан, субсидияны көрүү бу ый бүтүөр диэри быһаарыллыахтаах уонна олохтоохтор суруктарыгар Федеральной антимонопольнай сулууспа өрөспүүбүлүкэтээҕи управлениета бэрэбиэркэни ыытар.

Матырыйаалы бэлэмнээтилэр: Дарья Кузнецова, Станислав Коршун (ОТР сайта, ыам ыйын 6 күнэ).