Арассыыйа үрдүнэн бу босуобуйа 3,3 мөл. оҕоҕо көрүллүөн сөп, билиҥҥи туругунан дьиэ кэргэнтэн 1,3 мөл. сайабылыанньа киирбит. Биһиги өрөспүүбүлүкэбитигэр бастакы төлөбүрдэр оҥоһулуннулар. РФ Биэнсийэ пуондатын Саха сиринээҕи салаатын управляющайа Георгий Степанов иһитиннэрбитинэн, бастакы төлөбүрдэр муус устар 17 күнүгэр оҥоһуллубуттар. Ийэ хапытаалын ылар бырааптаах 390 дьиэ кэргэн үстэригэр диэри саастаах оҕолоругар муус устар ыйынааҕы анал төлөбүрү туппуттар. Муус устар 16 күнүнээҕи туругунан Биэнсийэ пуондатын Саха сиринээҕи салаатыгар 16088 сайабылыанньа киирбитин туһунан биэдэмэстибэ пресс-сулууспата иһитиннэрэр.  

Кимнээх ылар бырааптаахтарый?

    2020 сыл от ыйын 1 күнүгэр диэри ийэ хапытаалын сэртипикээтин ылбыт үстэригэр диэри саастаах оҕолоох ыаллар ити көмөнү ылар бырааптаахтар. Манна эрдэ ийэ хапытаалын атын сорукка туһаммыттара оруолу оонньоообот.

Төлөбүр кээмэйэ?

    Сайабылыанньаларын 2020 сыл от ыйын 1 күнүгэр диэри биэрбит дьиэ кэргэн муус устар, ыам уонна бэс ыйдарын устата 5 тыһ. солк. хас биирдии үстэригэр диэри саастаах оҕолоругар ылаллар. Өскөтүн, сайабылыанньаны от ыйын 1 күнүттэн алтынньы 1 күнүгэр диэри биэрдэхтэринэ, төлөбүр биир кэмнээх буолан,  15 тыһ. солк. ылыахтара. Оттон алтынньы 1 күнүн кэнниттэн сайабылыанньа биэрэр наадата суох, тоҕо диэтэххэ, ол кэнниттэн босуобуйаны биэрии тохтуур.  

Харчыны хайдах ылалларый?

    РФ Биэнсийэ пуондатын  сайтыгар эбэтэр судаарыстыбаннай өҥө порталыгар киирэн туһааннаах сайабылыанньа толоруллуохтаах. Судаарыстыбаннай өҥө порталыгар регистрацията суохтар олохтоох Биэнсийэ пуондатын  салаатыгар эбэтэр элбэх хайысхалаах өҥөнү оҥорор кииҥҥэ пааспардаах кэлэн сайабылыанньа толороллор.

Харчы хаһан түһүөҕэй?

     Сайабылыанньаны тустаах пуонда 5 үлэ күнүн устата көрөр, быһаарыы ылыллыбытын кэнниттэн 3 үлэ күнүн иһинэн сайабылыанньаҕа ыйыллыбыт баан суотугар харчы түһүөхтээх. Бу босуобуйаттан нолуок төлөммөт уонна социальнай эбии миэрэ буоларын быһыытынан дьиэ кэргэн орто дохуотун кээмэйигэр аахсыллыбат. 

  Ольга Софронова, икки оҕо ийэтэ, Дьокуускай куорат олохтооҕо:

- Уолум Айдын икки сааһын ааста. Соторутааҕыта интэриниэт ситимнэриттэн ийэ хапытаалыгар бырааптаах дьиэ кэргэҥҥэ 5 тыһ. солк. кээмэйдээх босуобуйа бэриллэр буолбутун истэн олус үөрбүтүм. Көмөнү хайдах ылар туһунан суруллубут этэ. Көмөнү ылар инниттэн элбэх сиринэн сүүрэн-көтөн,  докумуону хомуйуу суох.  Судаарыстыбаннай өҥө порталыгар регистрациялаах буоламмын, муус устар 16 күнүгэр сайабылыанньабын электроннай ньыманан ыыппытым. Дьиэҕэ олорон эрэ толорорго олус табыгастаах. Сайабылыанньам көрүүгэ сылдьар. Босуобуйаны биэрэр буоллахтарына, төлөпүөммэр  ол туһунан иһитиннэрии кэлиэхтээх. Бу уустук кэмҥэ  судаарыстыба оҕолоох дьиэ кэргэҥҥэ итинник эбии көмө оҥороро үчүгэй.