Айанньыттары Харбалаах, Тамалакаан, Ороһу уонна Нам нэһилиэктэрин кыраныыссаларыгар саха сиэринэн алгыстаах кымыһынан уруйдаан-айхаллаан көрүстүлэр. Хас биирдии нэһилиэккэ дьон-сэргэ аттаах дьон көрсөн арыаллаата.
Уолаттар Нам нэһилиэгин кыраныыссатыгар чугаһаабыттарыгар Балаҕаннаахтан В.С. Гаврильев атынан утары баран көрүстэ. Салгыы Ороһу баһылыга А.В. Антонов эстафетаны Нам уонна Балаҕаннаах баһылыктарыгар А.И. Кардашевскайга уонна С.И. Дмитриевка туттарда. Ыраахтан атынан айаннаан иһэр дьону И.Е. Чыычаахап уот оттон сахалыы алҕаата, арчылаата, арыылаах алаадьынан уонна быыппаҕынан күндүлээтэ, уһун суолга эрэйэ уонна мэһэйэ суох айаны баҕарда.
89 саастаах ытык кырдьаҕас Иннокентий Васильевич Кардашевскай билигин даҕаны ат үрдүгэр бигэтик олорор. Кини Дугуйдааны уонна Мичили эҕэрдэлээн туран, алгыс тылын эттэ уонна үтүө айаны баҕарда.
Былыр Балаҕаннаахтан Максим Мухоплев диэн уу сахалыы саҥарар нуучча киһитэ Арассыыйа Ыраахтааҕытыгар сахалар көрсүһэ баралларыгар тылбаасчыт быһыытынан барсыбыт эбит. Ол кэмҥэ бары сиэмибийэттэн симиэбийэҕэ диэри аттарын уларыта-уларыта айанныыллара. Максим Мухоплевтан билиҥҥи Мухоплевтар тэнийбиттэрэ. Бу дьон сыдьааннара Гаврил Мухоплев-Лөкөй Дьокуускайдыыр суолу арыйбыта. Күн бүгүн кинилэр удьуордарыттан Балаҕаннаахха сылгынан дьарыктанар Валерий Гаврильевич Мухоплев олорор.
- 0
- 0
- 0
- 0
- 0
- 0