Татарстаан салалтата, дьоно-сэргэтэ Саха сирин инвестиционнай, инновационнай уонна туристическай кыаҕын кытары билистилэр. Саха сирэ уонна Татарстаан өрөспүүбүлүкэлэрэ сайдыы туһугар бииргэ үлэлииргэ Сөбүлэҥ түһэристилэр. Эрэгийиэннэр салалталара, тэрилтэлэрэ, үөрэх кыһалара хардарыта дуогабар баттастылар. Саха сирин табаары оҥорон таһаарааччыларын бородууксуйаларын быыстапката, атыыта, артыыстар кэнсиэртэрэ буолла, олоҥхо көрдөрдүлэр. 

Саха сирин күннэрин чэрчитинэн Ил Түмэн дьокутааттара Татарстаан Судаарыстыбаннай Сүбэтин бэрэссэдээтэлэ Фарид Мухаметшины, парламеннарын кэмитиэттэрин салайааччыларын кытары көрүстүлэр. 

Икки өрөспүүбүлүкэ парламенын дьокутааттара экэниэмикэҕэ, бүддьүөккэ, экологияҕа уонна социальнай бэлиитикэҕэ сокуону оҥорууга бииргэ үлэлэһии өрүттэрин кэпсэттилэр. Коронавирус пандемиятын кэмигэр бэлиэрдик намтаабыт эрэгийиэн бүддьүөтүн дохуоттаах чааһын оҥоһуу боппуруостарыгар болҕомтолорун уурдулар. «Кэлиҥҥи сылларга Татарстааҥҥа саппаастаах бүддьүөтү ылыммаппыт, киирэр дохуоту судаарыстыбаннай бырагыраамаларынан тыырабыт. Бүддьүөппүт 95%-на бырагыраамалар олоххо киирэллэригэр ыытыллар», -- диэн Татарстаан парламенын бүддьүөккэ, нолуокка уонна үпкэ кэмитиэтин бэрэссэдээтэлэ Леонид Якунин иһитиннэрдэ.  

Саха Өрөспүүбүлэкитин парламентарийдара Татарстааҥҥа үлэлиир социальнай бырагыраамалар, тулаайах уонна төрөппүт көрүүтэ-истиитэ суох хаалбыт оҕолору олорор дьиэнэн хааччыйыы үлэтин, аччыгый уонна алын биисинэһи өйөөһүн ньымаларын туһунан интэриэһигээн ыйыттылар.  

Икки эрэгийиэн парламенын сис кэмитиэттэрин бэрэссэдээтэллэрин көрсүһүүлэригэр Татарстаан парламенын Судаарыстыбаннай Сүбэтин экологияҕа, айылҕаны туһаныыга, тыа хаһаайыстыбатыгар уонна ас-үөл бэлиитикэтигэр кэмитиэтин бэрэссэдээтэлэ Азат Хамаев, экэниэмикэҕэ, урбааҥҥа кэмитиэт бэрэссэдээтэлэ Лутфулла Шафигуллин, Ил Түмэнтэн бүддьүөккэ, нолуокка уонна сыана бэлиитикэтигэр, кэтэх бас билиигэ уонна приватизацияҕа сис кэмитиэтин бэрэссэдээтэлэ  Юрий Николаев, сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ  Владимир Прокопьев, норуот дьокутааттара  Семен Филиппов,  Ньургуйаана Захарова, Оксана Михайлова кытыннылар. 

Бэс ыйын 8 күнүгэр өрөспүүбүлүкэ кэскиллээх үлэтин сүрүннүүр уонна Арассыыйа социальнай-бэлитиичэскэй сайдыытыгар оруолун чопчулуур соруктаах «Саха сирэ-Татарстаан» эрэгийиэннэр икки ардыларынааҕы форумҥа икки өрөспүүбүлүкэ Бырабыыталыстыбатын чилиэннэрэ, парламеннарын дьокутааттара, муниципальнай тэриллиилэрин салалталара, култуура тэрилтэтин бэрэстэбиитэллэрэ кытыннылар.  

Форум түмүгэр Казань куорат ситэриилээх кэмитиэтин салайааччыта Рустем Гафаров уонна Дьокуускай куорат баһылыга Евгений Григорьев 2021-2022 сылларга бииргэ үлэлэһэргэ, Иннополис куорат мээрэ Руслан Шагалеев уонна Мииринэй куорат баһылыга Клим Антонов үлэлэрин сүнньүнэн уопуттарын атастаһары мэктиэлиир Сөбүлэһиилэргэ илии баттаатылар. Маннык Сөбүлэһиини Альметьевскай уонна Нерюнгри куораттар салалталара эмиэ түһэристилэр.   

2022 сылга Саха АССР төрүттэмитэ 100 сылыгар анаммыт тэрээһиннэр чэрчилэринэн Дьокуускайга Татарстаан Өрөспүүбүлүкэтин күннэрэ ыытыллар буоллулар.