Аахсыйа сыалынан-соругунан Саха Өрөспүүбүлүкэтин государственнай уонна официальнай тылларын киэҥник тарҕатыы, бэчээт уонна маассабай информация үлэһиттэрин ааттарын өрө тутуу, үүнэн иһэр көлүөнэҕэ ааҕыыны пропагандалааһын, ааҕыыны национальнай культурнай үгэс быһыытынан статуһун үрдэтии, өрөспүүбүлүкэ норуоттарын тылларын киэҥ араҥаҕа тарҕатыы уонна өйөөһүн буолар.  

Аахсыйаны СӨ инновацияҕа, сыыппара сайдыытыгар уонна инфокоммуникационнай технологияларга министиэристибэтэ, «Айар» кинигэ кыһата, «Саха» национальнай көрдөрөр-иһитиннэрэр хампаанньа тэрийэллэр. Быһа эфир 23:00 чаастан 00:00 ч. диэри буолуоҕа. Кыттыыны өрөспүүбүлүкэ салалтата, култуура үлэһиттэрэ, уопсастыбынньыктар, суруйааччылар бэчээт уонна атын сонуннары тарҕатар сириэстибэ тэрилтэлэрин үлэһиттэрэ ылыахтара.

Саха сирин үрүҥ түүннэрэ. Бу айылҕа силигилии ситэр, уйгулаах олоҕу түстүүр дьикти түгэнэ. Күлүм түгэнэ кылгас сайыммыт бу кэмҥэ төһөлөөх элбэх кэрэни, тапталы, сылааһы, эрэли бэлэхтээн ааһарый? Бу дьикти, хатыламмат, нуһараҥ үүт тураан түүннэргэ хас биирдии Саха сирин олохтооҕо сүрэх уотунан, санаа сырдыгынан олоҕу сандаардыах баҕата күүһүрэр. Дьэ эрэ, күндү доҕоттор, ол курдук кинигэни арыйан, улуу айымньылары ааҕан, Сахабыт сирин үрүҥ түүннэрин эбии сырдатыаҕыҥ! «Аҕыах үрүҥ түүн» диэн үһүс төгүлүн ыытыллар.