“Сахатранснефтегаз” кими даҕаны, хаһан даҕаны уулуссаҕа үүрбэтэҕэ, дьиэтэ-уота суох хаалларбатаҕа. Төттөрүтүн, хаарбах туруктаах дьиэлээх дьону кытта ыкса үлэлэһэн, кинилэр олорор усулуобуйаларын тупсарар. Хампаанньа социальнай көмүскэлэ суох дьиэ кэргэннэрдиин Дьокуускай куорат дьаһалтатын кытта бииргэ үлэлэһэр.

Дьону хаарбах дьиэттэн көһөрүүгэ, кинилэргэ мээрийэ иһинэн үлэлиир Дьиэ-уот сыһыаннаһыыларыгар департаменын ирдэбилинэн саҥа кыбартыыралары биэриигэ элбэҕи үлэлээтибит, билигин даҕаны сүҥкэн үлэ ыытылла турар.

“Биһиги хас биирдии дьиэ кэргэни кытта анаан үлэлэһэбит. Күн бүгүн 55 кыбартыыраттан 39-һа олорор усулуобуйатын тупсарда. Өссө тоҕус кыбартыыра боппуруоһа быһаарылла турар. Оттон 7 кыбартыыра быһаарылла илик. Биһиги кэмниэ кэнэҕэс дьиэлэрин-уоттарын кыһалҕата номнуо быһаарыллыбыт дьон махталын долгуйа, астына истэбит. Бу күннэргэ үгүс киһи кыбартыыратын өрөмүөннүү сылдьар”, -- диэн Уопсастыба баайга-дуолга уонна дуогабарга отделын сүрүннүүр исписэлииһэ Варвара Окоемова этэр.

Үтүө баҕа санаалаах, алгыстаах-махталлаах тылы этээччилэр ортолоругар Ирина Владимировна Лукьяненко баар. Кини дьиэ кэргэнин кытта Лермонтов уулуссатын 35-с №-гэр турар мас дьиэҕэ 1988 сылтан олорбута. Ирина Владимировна этэринэн, кинилэр дьиэлэрин өссө 2014 с. “хаарбах туруктаах” диэн билиммиттэр.

“Бастакы этээскэ олорбуппут. Ол эрээри онно киһилии усулуобуйа суох, доруобуйабытыгар улаханнык оҕустарар буоламмыт, кэлиҥҥи 12 сыл устатыгар мэлдьи куортамнаһан олордубут. Сииктэн, түүнүктэн аллергиялыыр буоллум. Санаан көрүҥ ээ, бэл, уолум көһөрүгэр көмөлөһөөрү эргэ кыбартыырабар киирэн баран, сирэйим-хараҕым, этим-сиинин бүтүннүү дарбаччы иһэн таҕыста! (отек квинкеубрать)! Билигин онтубун эмтэнэ сылдьабын. Саҥа дьиэбитигэр уолум олорор. Өрөмүөннээбитэ. Дьиэбит 2015 с. тутуу, биир хостоох. Ол эрээри урукку бэйэбит кыбартыырабытынааҕар быдан киэҥ. Онон биһиги олорор усулуобуйабытын тупсарбыппытыттан олус үөрэбит”.

Саҥа кыбартыыраҕа көһөн олороруттан астыммыт Ирина Васильевна Серых эмиэ махтал тылын этэр.

“Биһиги саҥа, киэҥ-куоҥ, олус үчүгэй былааннаах кыбартыыраны урут олорбут түөлбэбититтэн чугас ыллыбыт. Дьиэбит 2010 с. тутуу, икки хостоох, үһүс этээскэ баар буолан, сылдьарга бары өттүнэн олус табыгастаах. Бэлиэтээн эттэххэ, саҥа дьиэбит Лермонтов уулуссатын 35-с №-гэр баар урукку кыбартыырабытынааҕар быдан киэҥ. Лермонтовка турар эргэ кыбартыыраны 1980-с сс. өссө биһиги төрөппүттэрбит ылбыттара. Билигин биһиги киһи астынар түбүгэр умса түһэ сылдьабыт – дьиэбитин өрөмүөннүүбүт. Онон “Сахатранснефтегаз” тэрилтэҕэ чахчы үтүө көмөлөрүн иһин ис сүрэхпититтэн махтанабыт. Оттон биһиги курдук махталлаах дьон, дьиҥэр, элбэхтэр. Ыалларбыт бары даҕаны үчүгэй кыбартыыраларга көһөн, астына сылдьаллар”, -- диир Ирина Васильевна.

Билбэт дьоҥҥо сырдаттахха, Дьокуускайга 130-с кыбаарталы тутар быраабы ылыыга биллэриллибит аукцион түмүгүнэн “Сахатранснефтегаз” АУо уонна Дьокуускай дьаһалтата 2020 с. балаҕан ыйын 22 күнүгэр түһэрсибит дуогабардарын чэрчитинэн, хампаанньа түөрт дьиэ олохтоохторун көһөрүөхтээх. Онтон үһэ – хаарбах туруктаах.

“Сахатранснефтегаз” сокуоҥҥа олоҕуран, кыбартыыраны бас билээччилэргэ кыбартыыра ырыынактааҕы сыанатын харчынан толуйар, онтун ааһан, саҥа кыбартыыраны буларга көмөлөһөр. Дьон биһигини кытта үөрүүтүн тэҥҥэ үллэстэриттэн, махтанарыттан олус үөрэбит, астынабыт.