Ил Дархан Айсен Николаев ылыммыт быһаарыытын Амма өрүс эҥээригэр сытар улуустар дьоно эрэ буолбакка,  Саха сирин нэһилиэнньэтэ бары үөрэ иһиттибит.

Амма өрүс ыраас уутугар дуоһуйа сөтүөлээбит, сынньаммыт уонна сардаана сибэккинэн симэммит кэрэ кытылын биирдэ көрбүт киһи абылата сөбүлүүр, куттуун ылларар. Оннук дьикти уратылаах эбэ буолан, айылҕа маанылаах  сирин аһа дьэдьэн Амма чараҥар дэлэйдик үүнэн эрдэҕэ.

Өбүгэлэрбит айылҕаны тыыннааҕымсытан көрөр буолан, маһы мээнэ кэрдии сэттээх-сэлээннээх дии саныыллара. Төһө да биһиги сайдыылаах үйэҕэ олордорбут ытык дьоммут үгэстэрэ биһиги экологтарбыт үлэлэрэ эркээйилээх, кэскиллээх буоларыгар сирдиэхтээҕин олохпут ирдиир. Халыҥ ойуурдаах буоламмыт ыраас салгынынан сайа тыынан, баай Байанайдаах хара тыабыт күндүлээн аар айылҕабытын кытта алтыһан олоробут.

Мин дьонум-сэргэм аатыттан Ил Дархан Айсен Сергеевичка махталбын тиэрдэбин!

Тапталлаах Аммабыт баһыгар маһы кэрдии тохтотуллубута айылҕа маанылаах кыыллара таптаан ыырданар Аммабыт эргэнэ хара тыатын, суугунуур күөх ойуурун көмүскэлигэр туруммут араас түмсүүлэргэ, идэлээх учуонайдарга уонна биирдиилээн дьоҥҥо эрэли саҕар үөрүүлээх сонун буолла.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ Саха сиригэр элбэх сири-уоту оһуобай харыстанар түөлбэ оҥорон уратытык харыстыырын, ити хайысханан киэҥ хабааннаах үлэни ыытарын үрдүктүк сыаналыыбыт уонна анал бырагыраама оҥорон, Амма өрүһү ураты харыстанар эбэ оҥороругар этии киллэрэбит. Оччоҕо Амма эбэбит барыбытын ыраас уутунан хатаҕалыа, итиэннэ ходуһаларбытын угуттаан хороҕор муостаах хойдуо, сыспай сиэллээх үксүө этэ. Тыа сиригэр дьоммут-сэргэбит талаһан, үлэ-хамнас күөстүү оргуйуо турдаҕа.

Биһигини Аан айылҕабыт эргиччи арчылыыр. Ойууру ыраастыыр, чэбдигирдэр үлэ нэһилиэнньэ киэҥ билиитигэр киэҥник сырдатыллыахтаах, бары түмсэн, сомоҕолоһон үлэлээтэхпитинэ, айылҕабыт да чөл, бэйэбит да чэгиэн туруктаах буолуохпут.