От ыйын 1 күнүттэн хоруонаны утары быһыыны ылбыт эбэтэр ПЦР анаалыһын туттарбыт дьоҥҥо (72 чаас болдьохтоох) аналлаах “хоруоната суох сирдэр” баар буоллулар. Кафелар-эрэстэрээннэр, остолобуойдар-бардар, фитнес-кулууптар уонна да атыттар толору күүһүнэн үлэлиир кыахтаннылар. Көҥүллүүр ыйааҕы бэс ыйын 25 күнүгэр Ил Дархан Айсен Николаев баттаабыт.
“КОВИД-фри” (судургутук, хоруоната суох (көҥүл) сирдэр) дэнэр тэрилтэлэргэ QR куодунан эрэ киллэрэр буолуохтара. Куоду “Госуслуги.Стопкоронавирус” порталынан бэрэбиэркэлиэхтэрэ. Оннуга суох дьон тэрилтэлэргэ үс күн иһигэр оҥоһуллубут ПЦР анаалыһын ыспыраапкатын уонна бэйэни туоһулуур докумуону көрдөрүөхтээхтэр. Хааччаҕа суох үлэлиир тэрилтэлэр үлэһиттэрэ ити ирдэбили эмиэ тутуһуохтаахтар.
От ыйын 9 күнүнээҕи туругунан, СӨ Урбааҥҥа, атыыга-эргиэҥҥэ уонна туризмҥа министиэристибэтэ этэринэн, Саха сиригэр уопсайа 12 “хоруоната суох көҥүл сир” баар буолбут. Ол курдук, Дьокуускай куоракка – 10, Ньурбаҕа – 2. Баларга мааската, бэрчээккэ суох киириэххэ сөп.
- 0
- 0
- 0
- 0
- 0
- 0