Санатан аһардахха, атырдьах ыйын 7 күнүгэр Бэс Күөлүн “Кэскил” түөлбэтэ ойуур баһаарыгар умайбыта. 30 олорор дьиэ уонна 8 хаһаайыстыбаннай тутуу күдэҥҥэ көппүттэрэ. Онуоха Саха Өрөспүүбүлүкэтин салалтата эмсэҕэлээбиттэргэ толору көмөнү оҥорорун туһунан мэктиэлээбитэ. Инньэ гынан, билигин бөһүөлэк умайбыт түөлбэтигэр тутуу тигинэччи бара турар.
Екатерина уонна Алексей Саввиновтар саҥа дьиэлэрин күлүүһүн Ил Дархан Айсен Николаев илиититтэн туттулар.
“Аан бастаан дьон итэҕэйбэтэҕэ. Бачча кылгас кэм иһигэр дьиэлэри тутуохтара дии санаабатахтара. Ол эрээри, билигин бөһүөлэккэ тутуу өрө күүрүүлээхтик бара турар. Ити бары сомоҕо күүс буолан ыарахаттары барытын кыайар кыахтаахпытын көрдөрөр”, – диэн Ил Дархан бэлиэтээтэ.
Айсен Сергеевич “Алроса” уонна Роснефть хампаанньалар салалталарыгар махтанна. Кинилэр өрөспүүбүлүкэ салалтатын көрдөһүүтүн тута ылынан, нэһилиэги сөргүтүүгэ 200 мөл. уонна 25 мөл. солк. ыыппыттар. Маны сэргэ, Ил Дархан доброволецтар штабтарыгар махталын тиэртэ. Кинилэр уопсайа 7 мөл. 800 тыһ. солк. хомуйбуттар. Ити харчынан ыаллар мал-сал ылыналлара былааннанар.
“Биһиги саҥа дьиэбит сырдык, сылаас уонна үтүө суобастаахтык тутуллубут. Мантан ыла дьиэбит иһин оҥостуохпут. Арассыыйа уонна Сахабыт сирин былаастарыгар, дойду Бэрэсидьиэнигэр Владимир Путиҥҥа уонна Ил Дархаммытыгар Айсен Николаевка муҥура суох махтанабыт”, – диэн Екатерина уонна Алексей Саввиновтар махталларын биллэрдилэр.
Даҕатан эттэххэ, Бэс Күөлүгэр уопсайа 34 саҥа дьиэ тутуллуохтаах. Былаан быһыытынан тутуу уонна өрөмүөн үлэлэрэ алтынньы 15 күнүнэн түмүктэниэхтээхтэр.
СИА матырыйаалынан.
- 0
- 0
- 0
- 0
- 0
- 0