Маннык быһаарыныы  от ыйын ыйын 30 күнүгэр Уһук Илиҥҥи уонна  Сибиир онкологтарын Ассоциацията тэрийэн ыыппыт Иркутскай, Новосибирскай, Чита уобаластарын, Приморскай кыраай уонна Саха сирин  сүрүн онкологтарын мунньаҕар ылылынна. Тэрээһиҥҥэ Саха сирин онкологическай диспансерын кылаабынай бырааһа  Лена Афанасьева кыттыыны ылла. Эрэгийиэннэр  быраастара онлайн-мунньах көмөтүнэн  Сибииргэ уонна Уһук Илиҥҥи уокурукка  аан дойдутааҕы мэдиссиинэ кластерын тэрийии туһунан  кэпсэтэн, итиннэ туох санаалаахтарын, бэйэлэрин тус көрүүлэрин иһитиннэрдилэр.

Мунньахха  СӨ Ил Дарханын  уонна СӨ Быратыыталыстыбатын  быһаччы көмөлөрүнэн Саха сирин онкологтара кэккэ  ситиһиилээхтэрэ этилиннэ. Ол курдук, бэрт аҕыйах кэм иһигэр  радиологическай корпус саҥардыллыбыт,  диспансер саҥа оборудованиеларынан хааччыллыбыт,  онкологтары Арассыыйа, аан  дойду таһымнаах клиникаларга үөрэтии тиһигэ быһыллыбакка ыытыллыбыт. Өрөспүүбүлүкэ үрдүнэн  онкологическай 12 амбулаторнай киин аһыллыбыт. Итини тэҥэ, саамай хайҕаллааҕа диэн,  Дьокуускай куоракка онкологическай киин тутуллар боппуруоһа быһаарыллыбыта буолар. Тоҕо диэтэххэ, киин тутуллуутун Саха сирин олохтоохторо күүппүттэрэ ыраатта. «Маладьыастар! Саха сиригэр баар кэллиэгэлэрим миигин олус cөхтөрдүлэр!», - диэн  мунньаҕы иилээн-саҕалаан ыыппыт Сибиир федеральнай уокуругун кылаабынай онколога, Иркутскайдааҕы онкодиспансер кылаабынай бырааһа, мэдиссиинэ наукатын доктора, профессор Виктория Дворниченко  үөрбүтүн, астыммытын биллэрдэ. Онон бэрт сотору кэминэн  Саха сирин онколог-быраастарын ситиһиилэрин атын эрэгийиэннэр билиэхтэрэ-көрүөхтэрэ.

СӨ Ил Дарханан уонна Бырабыыталыстыбатын  матырыйаалларынан оҥоһулунна.