Саха сиригэр пандемия саҕаланыаҕыттан 56 632 киһи сутуллубут. Ити ПЦР анаалыстара “положительнай” буолбуттар эрэ ахсааннара. Дьиҥэр, “отрицательнайы” көрдөрбүт эрээри, коронавирустаабыттар үгүстэр. Ону ИФА бэркэ быһаарар.

Өрөспүүбүлүкэбитигэр балтараа тыһыынча киһи хамсыктан суорума суолламмытын официальнайдык бигэргэтэллэр. Алтынньы 8 күнүгэр Арассыыйаҕа быйылгы антирекорд олохтонно -- 27 230 киһи ыарыйда, 936 киһи тыына быһынна.

Билиҥҥи туругунан Саха сиригэр 360 тыһ. киһи вакцинацияланна, ол эбэтэр нэһилиэнньэ уопсай ахсааныттан 40-ча %-на. Өссө балаҕан ыйын саҥатыгар АХШ нэһилиэнньэтин 57%-на, Аангылыйа 67%-на, Франция 66%-на быһыыны толору ылбыта. Арассыыйа ити чааһыгар Европа дойдуларыттан ыраах кэнники миэстэҕэ сылдьар.

РФ дьоно быһыыны ылбатыннар диэн, сорох судаарыстыбалар, харчыларын да харыстаабакка, куйаар ситиминэн утары аҕытаассыйаны күүскэ ыыталлар. Көрдөрөр-иһитиннэрэр сириэстибэлэр кэпсииллэринэн, дойдубутун куорҕаллыыр 58 иноагент тэрилтэлэрэ тастан үбүлэнэллэр үһү. Эбиитин билиҥҥи былааһы сөбүлээбэт сахалар төрөөбүт тылларынан суруйан ыыталлар, ону бассаапынан тарҕаталлар. Ол түмүгэр вакцинаны ылыы өрөспүүбүлүкэбитигэр олус бытаан. Маннык тэтиминэн хаһан нэһилиэнньэ 65-70%-на быһыы ылара буолла? Оттон Ил Дархан соруга -- 80% этэ. Оччоҕо эрэ кэлэктиибинэй иммунитет үөскүүр. Билигин Арассыыйаҕа да, аан дойдуга да коронавирустан өлүү 98%-на вакцина ылбатах дьон, эбиитин саамай ыараханнык ыалдьааччылар эмиэ кинилэр. Сахалар төттөрү этээччилэргэ итэҕэйимиэҕиҥ, бэйэбит олохтоох быраастарбытын истиэҕиҥ, күргүөмүнэн быһыыны ылыаҕыҥ!

Михаил АРХИПОВ, биэнсийэлээх.