Быһыы биэрии өрөспүүбүүлүкэ киин куоратыгар эмиэ биллэ аҕыйаабыта бэлиэтэнэр. «Хоруона дьаҥыттан өлбүт ыарыһахтар быһыы ылбатахтара биллэр – «медотвод» биричиинэтинэн эбэтэр араас матыыптанан тус бэйэтин санаатынан», - диэн вице-премьер Ольга Балабкина болҕомтотун уурда.

Айсен Николаев Дьокуускайга түүҥҥү кулуубтар көҥүлэ суох үлэлииллэрин, дьон маассабайдык мустуутун, билиҥҥи уустук усулуобуйаҕа табыллыбатын туһунан этиннэ. Баһылык маннык тэрилтэлэргэ сыһыаннаан ордук быһаарыылаах дьайыылары олоххо киллэрэри наадалааҕын ыйда. Ону таһынан, административнай хамыыһыйалар уонна Ис дьыала уорганнара хонтуруолунай рейдэлэри оҥороллоругар мэһэйдэри үөскэтэр табыллыбатын бэлиэтиир.

Өрөспүүбүлүкэ баһылыга барыбытыгар биир тэҥник, ханна баҕарар хааччахтыыр миэрэлэри тутуһууну сытыытык туруорда. «Хааччахтыыр миэрэлэри кэһии киһи олоҕор сыаналанар. Чуолаан, өйдүөххэ наада – хааччахтыыр дьаһаллары тутуһаммыт  дьон олоҕун быыһыахпыт», - диэтэ Ил Дархан. Суһал ыстаап сүбэ мунньаҕын түмүгүнэн, Саха сирин баһылыга Айсен Николаев күһүҥҥү каникулу биллэрии туһунан боппуруоһу алтынньы 30 күнүттэн сэтинньи 7 күнүгэр диэри сүбэ-ама биэрэргэ сорудахтаата. СӨ премьер-миниистиригэр Андрей Тарасенкоҕа Өлүөнэ өрүс мууһа турар кэмигэр наадалаах кислород саппааһын хааччыйарга, ону тэҥэ эппиэттээх бэрэссэдээтэли солбуйааччылары уонна миниистирдэри кытта булгуччулаах хоруона дьаҥын утары быһыыны биэрии тэтимин үрдэтиини ситиһэргэ сорудахтаата.

Айсен Николаев бэлиэтиир: хоруона дьаҥын утары охсуһууга уустук боппуруостары бииргэ быһаарыахтаахпыт, сорудахтаммыт үлэ фроннарын иһин толору эппиэтинэһи ылынары өйдүүр наадалаах.