Бу туһунан уураахха Арассыыйа Бырабыыталыстыбатын Бэрэссэдээтэлэ Михаил Мишустин илии баттаата. Айсен Николаев биир мүнүүтэҕэ тыһыынчаттан тахса лиитирэ кислороду таһаарар үрдүк кыамталаах концентратордар коронавируһунан ыалдьан, тыыннара кылгаабыт дьоҥҥо ананалларын туһунан эттэ. Ил Дархан доруобуйа харыстабылын министиэристибэтигэр федеральнай харчы түргэнник түһэрин хааччыйар тустаах докумуоннары, о.д.а. суһаллык бэлэмнииргэ сорудахтаабыт.

Коронавируһунан ыараханнык ыалдьар дьон ахсаана элбээн, балыыһаларга кислородунан хааччыйыыга наадыйыы улааппыт. Сэтинньи 2 күнүнээҕи туругунан, ИВЛ аппараакка 38 киһи холбоммут. Дойду 50 эрэгийиэннэригэр балаһыанньа эмиэ маннык эбит, онон 157 концентраторы атыылаһан аҕалан, таҥан туруорарга 5 миллиард солкуобай көрүллүбүт. Санатан эттэххэ, кислород концентратордарын атыылаһарга эбии үбү көрөргө сэтинньи 1 күнүгэр ыытыллыбыт коронавирус ыарыы тарҕаныытын утары охсуһар Сүрүннүүр сүбэ мунньаҕар этиллибитэ диэн Ил Дархан уонна Бырабыыталыстыба пресс-сулууспата иһитиннэрэр.