Статистика көрдөрүүтүнэн, 389 013 киһиттэн, өрөспүүбүлүкэ нэһилиэнньэтин 54 %-на эрэ вакцинация бастакы түһүмэҕин ааспыта биллэр. Улуустарынан муҥутуур бастыҥ Аллайыаха оройуона 70% нэһилиэнньэҕэ быһыыны туруорда. Медкиин кылаабынай бырааһа Римма Яковлева этэринэн, өрөспүүбүлүкэ үрдүнэн вакцинация былаана 55% туолла, оттон Дьокуускайга - 62%.

Сиһилии #СтопКоронавирусЯкутия иһитиннэриитинэн, киин куоракка нэһилиэнньэ 55,61%-гар хамсык утары быһыыны биэрдилэр.  Киин улуустар бөлөхтөрүгэр  бастыҥ көрдөрүүнү Хаҥалас оройуона  көрдөрдө (55,15%), оттон намыһах – Нам, Чурапчы уонна Уус-Алдан оройуоннарыгар. Соҕуруулуу-арҕаа бөлөх улуустарга Ленскэй оройуон инники сылдьар (60,22%),  Нерюнгри, Үөһээ Бүлүү уонна Мииринэй оройуоннара хаалан иһэллэр. Илин бөлөх улуустарыгар Уус Майаҕа - 62,03% нэһилиэнньэ быһыыны ылла, Өймөкөөҥҥө — 61,60%, Томпоҕо — 53,80%.

Уустук  эпидемиологическай балаһыанньа  Абый, Амма, Эдьигээн, Мэҥэ Хаҥалас, Нам, Өлөөн, Уус Алдан оройуоннарыгар бэлиэтэнэр.

Санаттахха, тас дойдуларга  Pfizer/BioNTech, Moderna, AstraZeneca, Johnson & Johnson хампанньалар вакциналарын туруораллар. Оттон арассыыйа үрдүнэн 3 вакцина биэрэллэр: «Спутник V» (ол иһигэр Лайт), «ЭпиВакКорона» уонна «КовиВак».

Сэтинньи 1 күнүгэр Саха сиригэр барыта 396 742 киһи (40,4% нэһилиэнньэ, 55,3% улахан дьон) бастакы вакциналарын ыллылар, оттон 369 836 киһи (37,7% нэһилиэнньэ, 51,5% улахан дьон) быһыыны толору ылбыттара биллэр. Барыта 766 578 коронавируснай инфекцияны утары быһыы оҥоһуллубут, 20 807 киһи  6 ый кэннэ иккис быһыыларын ылбыттар.