Бүгүн Ил Дархан өрөспүүбүлүкэ вице-премьерэ Ольга Балабкинаны уонна СӨ Доруобуйа харыстабылыгар миниистирэ Лена Афанасьевалыын көрсөн, тыҥаабыт балаһыанньаны быһаарсан кэпсэттилэр. Ол түмүгүнэн Айсен Николаев “Өрөгөй” спортивнай комплекс уораҕайыгар эбии амбулаторнай киини аһан үлэлэтэргэ эттэ. Онно ОРВИ, грипп, ковид симптомнаахтар анаалыс туттарыахтара, терапевка көрдөрүөхтэрэ.  

Пандемия саҕаланыаҕыттан короновирус инфекциятын утары араас профилактическай дьаһаллар ылыныллаллар, онтон саамай көдьүүстээҕэ вакцинация уонна ревакцинация буолар. Вакцина антитела үөскэтэрин, ыарыыны кытта охсуһарын дьэҥкэтин көрдөрдө. Ыарыыны тохтоторго нэһилиэнньэҕэ кэлэктиибинэй иммунитет үөскүүрэ уолдьаста. Ол туһуттан, саатар, быһыы ылар саастаах дьонтон 80 бырыһыана вакцинацияланыан наада.

Бырабыыталыстыба уонна Баһылык пресс-киинэ иһитиннэрэринэн, тохсунньу 24 күнүнээҕи туругунан вакцина маҥнайгы компоненын өрөспүүбүлүкэ үрдүнэн нэһилиэнньэ (улахан дьон ахсааныттан) 78,12%:-на ылбыт. Дьокуускай куоракка бу сыыппара 80,6% тэҥнэһэр.

Бастыҥнарга Аллайыаха, Аллараа Халыма, Орто Халыма, Эдьигээн, Муома оройуоннара киирэллэр. Хаалан иһэр биэс оройуоҥҥа -- Мииринэй, Үөһээ Бүлүү, Нерюнгри, Нам уонна Чурапчы.

Саха Сирин доруобуйа харыстабылын тэрилтэлэригэр мэдиссиинэҕэ үлэлээбэт миэдиктэри баҕа өттүнэн короновирус утары үлэлииллэригэр ыҥырдылар. Бу туһунан вице-премьер Ольга Балабкина эппитэ.

ХИФУ мэдиссиинэ институтун преподавателлэрэ колл-кииннэргэ сүбэ биэрэн саҕалаатылар. Дьокуускай куорат доруобуйа харыстабылын тэрилтэлэригэр министиэристибэлэр уонна биэдэмистибэлэр 63 тырааныспары уларыстылар.

Медколледж уонна мединститут 319 устудьуона доруобуйа харыстабылын тэрилтэлэригэр көмөлөһүөхтэрэ.

«Амма олоҕо” хаһыат суруналыыстара Роспотребнадзор Амматааҕы салаатын салайааччыта Айаллаана Романоваттан саҥа күөрэйбит “омикрон” штамматын туһунан ыйыталаспыттар. Маныаха “омикрон” штамм сүрүннээн тымныйыыга майгынныырын бэлиэтээбит. Ол курдук, холобура, киһи муннун уута сүүрэр, сөтөллөр, күөмэйэ ыалдьар, температурата тахсар. Онтон оҕолорго эттэригэр ымынах тахсыан сөп. Маны сэргэ сорох дьоҥҥо температуралара төттөрүтүн түһүөн сөп.

Омикрон сүрүн уратыта диэн, кини инкубационнай, ол эбэтэр саһан сытар кэмэ кылгас уонна 7 төгүл түргэнник тарҕанар.

Ыарыыга сыстыбат туһуттан боростуой быраабылалары тутуһуохха наада. Элбэх дьонноох сиргэ сылдьыбаппыт, мааска кэтэбит, илиибитин сууна сылдьыахтаахпыт, антисептиктэри туттабыт, социальнай дистанцияны тутуһабыт. Дьиэҕитин салгылатыҥ, таһырдьа сибиэһэй салгыҥҥа сылдьыҥ, битэмииннээх, иҥэмтэлээх астарынан аһааҥ, чөл олоҕу тутуһуҥ, ыалга улахан наадата суох сылдьартан уонна бырааһынньыктары тэрийэртэн туттунуҥ.

Коронавируснай инфекция бары штаммаларыттан саамай көмүскэнэр ньыма, биллэн туран, вакцинация. Өскөтүн вакцинациялаах буоллаххына, ыарыйдаххына да чэпчэкитик аһараҕын диэн сүбэлиир.

Галина МАТВЕЕВА.