Бырайыак бэрээдэгинэн кырдьаҕастары көрүүгэ-харайыыга ылбыт дьиэ кэргэҥҥэ көмө харчы оҥоһуллар. 2020 сылга ыйын аайы төлөнөр харчы 20701 солкуобайга тэҥнэспит. Санатар буоллахха, бу үп кээмэйэ сылын аайы индексацияланар. Маны таһынан кырдьаҕас киһи биэнсийэтиттэн 75% бэйэтин наадатыгар туттар.
Кырдьаҕастары ыалга көрүүгэ-харайыыга ылыы үлэтин өрөспүүбүлүкэ үлэҕэ уонна социальнай сайдыыга министиэристибэ олохтоох социальнай управлениеларын кытары ыытар. Маныаха улуустартан сайаапка хомуйар. Бу уопут 2013 сылтан саҕаламмыта. Сыалынан-соругунан соҕотох хаалбыт кырдьаҕас киһи алаһа дьиэ сылааһын билэн, дьон истиҥ сыһыаныгар уйдаран олорорун ситиһии буолар. Иитэр ыалга өйүн сүтэрбэтэх, ол эрээри бэйэтин толору көрүнэр-харайынар кыаҕа суох буолбут 55 саастарыттан үөһээ саастаах дьахтар, 60 саастарыттан үөһээ саастаах эр киһи олоро киирэллэр. Аҕам саастаах киһи туһугар эппиэтинэс ылбыт ыал кинилэри сөптөөхтүк көрөн-истэн олордуохтаах.
- 0
- 0
- 0
- 0
- 0
- 0