60 саастарыттан тахсыбыт үлэ бэтэрээннэрэ, сэрии оҕолоро санаторийга-куруортка эмтэнэллэригэр чэпчэтиилээх путевканы эбэтэр үлэ министиэристибэтин хайысхатынан харчынан төлөбүр компенсацияны ылыахтарын сөп. Нэһилиэнньэ уонна үлэ социальнай көмүскэлигэр сайабылыанньа суруйан уопсай уочаракка тураллар. Бу туһунан Саха сирин үлэҕэ уонна социальнай сайдыыга миниистирэ Елена Волкова иһитиннэрдэ.
Аан дойдуну атыйахтаах уулуу аймаабыт сыстыганнаах дьаҥ туран, санаторийга сынньанааччылар кэккэ ирдэбили тутуһаллар. Хамсык уустук балаһыанньатынан сибээстээн, санаторийга-куруортка эмтэниигэ иммунизация кууруһун толору ааспыт уонна быһыы ылбыттара 42 күн буолбут эрэ дьон киирэллэрэ көҥүллэнэр. Маны таһынан дьаҥҥа хаптарбыт дьон 3 ый кэннэ киирэн доруобуйаларын бөҕөргөтүөхтэрин сөп. Бэтэрээннэр кэккэ биричиинэнэн санаторийга кыайан киирэн эмтэнэр кыахтара суох буоллаҕына, харчынан компенсацияны ылыахтарын син. Бу чэпчэтиинэн икки сылга бииргэ туһанар кыахтаахтар.
Саха сирин иһигэр эмиэ чэпчэтиилээх сыананан санаторийга эмтэниэхтэрин эбэтэр путевка сыанатыттан 80 %-нан харчынан ылыахтарын сөп. Сэрии оҕолоругар путевка уопсай сыанатыттан 50 % төлөнөр буолуоҕа.
Бэйэлэрин харчыларынан путевка атыылаһан сынньанан-эмтэнэн кэлбит саастаах дьон биир сыл иһигэр Нэһилиэнньэ уонна үлэ социальнай көмүскэлигэр сайабылыанньа суруйан, ирдэнэр докумуоннары туттаран харчыларын төнүннэрэр кыахтаахтар.
Сайабылыанньаны урукку курдук уһун-киэҥ уочаракка турбакка эрэ, Суударыстыбаннай өҥөлөр саайтарыгар ыытыахтарын сөп. Болдьохтоох кэм иһигэр харда эппиэти тутуохтара.
-
0
-
0
-
0
-
0
-
0
-
0
