«Олох суола» арыллыытын 80 сылын чэрчитинэн, балаҕан ыйыгар РФ Бэрэсидьиэнэ Владимир Путин Ленинград блокадатын олохтоохторугар уонна көмүскээччилэригэр биир кэмнээх төлөбүрү аныыр туһунан Ыйаахха илии баттаабыта.

Ыспыраапка

«Олох суола» - Аҕа дойду улуу сэриитин кэмигэр Ладога ытыс күөлүн нөҥүө соҕотох тырааныспар магистрала буолара. Навигация кэмигэр — уунан, кыһын — муус үрдүнэн. Балаҕан ыйын 12 күнүттэн 1941-1943 сылларга диэри Ленинград блокаднай куоратын дойдуну кытта сибээстээбитэ.

Бу сыалга Михаил Мишустин  этэринэн, дойду Бырабыыталыстыба федеральнай бүддьүөттэн барыта 4 млрд солк. аныаҕа. «Бэрэсидьиэн Ыйааҕынан «Ленинград көмүскэлин иһин» мэтээлинэн, эбэтэр «Ленинград блокаднай олохтооҕо» бэлиэнэн наҕараадаламмыттары барыларын өйүүр туһунан быһаарыы ылыллыаҕа. Кинилэргэ биир кэмнээх төлөбүр оҥоһуллар», - диэн быһаарда. РФ Бырабыыталыстыбатын баһылыга, - Тустаах төлөбүр сэтинньи 22 күнүгэр диэри түһүөҕэ, - диэн чуолкайдаата.

Санаттахха, билигин Саха сиригэр 20-тэн тахса Ленинград блокадатын кыттааччыта олорор. Кинилэр Ленинград блокадниктарын норуоттар икки ардыларынааҕы ассоциацияларын эрэгийиэннээҕи салаатын чилиэннэринэн буолаллар.