Саха дьахтара
Автобуска мин көрдүм,
Аҕамсыйбыт сэбэрэлээх
Саха дьахтарын
Уонна санаатым:
“Кэрэтик да кырдьыбыт”, – диэн.
Дьэ, кырдьык,
Кырдьар саас илдьэ барар
Эн сирэйиҥ кэрэтин,
Ол гынан, эйигин
Олоҕун устата арыаллыыр
Эн дууһаҥ кэрэтэ.
Мин көрдүм кэрэ дьахтарга
Кини намчы сүргэтин,
Иһиттим курдаттыы тартаран
Кини эйэҕэс чөл кутун.
Кэрэтик кырдьыы – дьол...
Киһиэхэ тардыһар күүс,
Күн сирин олоҕор
Кэрэни эрэ саныахха,
Кэрэҕэ эрэ айыахха.
Изабелла Петровна Матвеева-Алаас Хотуна
Изабелла Петровна Матвеева-Алаас Хотуна, биологическай билим хандьыдаата, просветитель-эколог, “Алаас Хотун” өрөспүүбүлүкэтээҕи хамсааһын бэрэссэдээтэлэ.
1945 сыл алтынньы 6 күнүгэр Уус Алдан оройуонун Баатаҕай нэһилиэгэр төрөөбүт. 1963 сыллаахха Дүпсүн орто оскуолатын уонна 1968 сыллаахха СГУ-ну бүтэрбит. 1973 сыллаахха ССРС Билимин Академиятын Сибиирдээҕи салаатын Саха сиринээҕи филиалын биологияҕа институтун аспирантуратын бүтэрбит.
Соторутааҕыта “Алаастар ааннарын аһаммын” диэн хоһооннорун хомуурунньуга тахсыбыта. Манна алаас ахтылҕана, кини кэрэтэ, отун-маһын туһата, дьэдьэн сыта, мутукча тыллыыта, түптэ самаархай буруота, ынах маҥырыыра, сылгы кистиирэ, о.д.а. саха киһитигэр чугас көстүүлэр дьикти иэйиилээхтик, итэҕэтиилээхтик хоһуйуллаллар.
Изабелла Петровна 25 сыл устата өрөспүүбүлүкэтээҕи “Алаас Хотун” дьахталлар түмсүүлэрин тэрийэн, салайааччынан үлэлии сылдьар. Өрөспүүбүлүкэҕэ сайылык күнүн туруорсан, бэс ыйын 22 күнэ – Сайылык күнүнэн биллэриллибитэ. Бэйэтэ биолог үөрэхтээх буолан, айылҕаны харыстыырга, эмтээх оттору туһанарга элбэх сырдатар үлэни-хамнаһы ыытта. Изабелла Матвеева “Арассыыйа 100 бастыҥ дьахталлара” энциклопедияҕа киирбитэ.
-
0
-
0
-
0
-
0
-
0
-
0
