Бүгүн Саха сирин дьоно-сэргэтэ, эдэр ыччат биллиилээх судаарыстыбаннай уонна уопсастыбаннай диэйэтэллэр Максим Аммосов, Былатыан Ойуунускай, Исидор Барахов, Степан Аржаков уонна кинилэри кытта Саха сирэ автономнай өрөспүүбүлүкэ буоларын ситиспит, үгүс сыраларын уурбут дьоммут үтүө ааттарын кэриэстиир, сүгүрүйэрбитин, махтанарбытын биллэрэр күммүт. Саха сирэ автономияны ситиһиитэ Уһук Хоту дойду олохтоохторун олохторо-дьаһахтара тупсуутугар олугу уурбута. Ол курдук, Саха сиригэр бырамыысыланнас, тыа хаһаайыстыбата, доруобуйа харыстабыла, үөрэх, наука, култуура күүскэ сайдан, кэҥээн барбыттара.
Оттон өрөспүүбүлүкэ саҥа историятыттан сэгэттэххэ, Саха Өрөспүүбүлүкэтин уон иккис ыҥырыылаах Үрдүкү Сэбиэтин уочарата суох 1992 сыл муус устар 27 күнүнээҕи сессиятыгар Саха Өрөспүүбүлүкэтин билиҥҥи Конституцията (Төрүт Сокуона) үлэҕэ киирбитэ. Мантан ыла судаарыстыбаннас сайдыытын саҥа кэрдииһэ саҕаламмыта, өрөспүүбүлүкэ үп-харчы-экэниэмикэ өттүнэн төрүтэ, конституционнай-правовой тиһигэ олохтоммута.
Күндү Саха сирин олохтоохторо! Муус устар 27 күнэ өссө Россия парламентаризмын күнүнэн билиниллэр. Билигин федеральнай уонна регионнааҕы парламеннар хоруона хамсыга күүскэ тарҕанар куттала үөскээбит кэмигэр Россия дьонун-сэргэтин иннигэр улахан эппиэтинэһи сүктүлэр. Ол курдук, Саха сирин парламена муус устар ыйга бу кутталлаах ыарыыны бохсор инниттэн уталытыллыбакка ылыныллыахтаах дьаһаллар чэрчилэринэн икки пленарнай мунньаҕы тэрийэн ыытта. Бу дьаһаллар дьон ордук уйан араҥатыгар – аҕа саастаах көлүөнэҕэ туһуланнылар. Ону тэҥэ бу быыһык кэмҥэ дьоҕус уонна орто урбааны өйүүр инниттэн үлэлии олорор сокуоннарга уларытыылар киирдилэр.
Өрөспүүбүлүкэ салалтата, Саха сирин парламена уонна бырабыыталыстыбата өрөспүүбүлүкэ олохтоохторун олохторугар-дьаһахтарыгар уонна доруобуйаларыгар суоһуур кутталы аччатар, бохсор туһугар араас өрүттээх дьаһаллары ылыннылар, ылыналлар. Итиэннэ хааччахтыыр миэрэлэр дьон-сэргэ олоҕор күүскэ охсубаттарын, дьайбаттарын туһугар күннэтэ түбүгүрэллэр.
Ытыктабыллаах биир дойдулаахтарым!
Россия элбэх омуктаах бүттүүн норуота бу быыһык кэми этэҥҥэ аһарыа, кыайыылаах-хотуулаах тахсыа диэн бигэ эрэллээхпин. Биһиги дьоммут, норуоппут оннооҕор буолуох ыар сыллары, кырыымчык кэмнэри ааһан-туораан кэлбитэ. Ону история да туоһулуур. Ону барытын дойдубут дьоно биир сомоҕо буолан, норуот санаатын күүһүнэн, инникигэ дьулуурунан, ураты тулуурунан этэҥҥэ ааспыта. Бүгүҥҥү бырааһынньыгы биһиги ураты усулуобуйа кэмигэр көрүстүбүт. Коронавирус диэн ааттанар сыстыганнаах ыарыы өрөспүүбүлүкэбитигэр күүскэ тарҕамматын инниттэн үгүспүт дьиэбитигэр бүгэн олоробут. Бу хааччахтыыр миэрэ биир ирдэбилэ. Бу миэрэни тутустахпытына, биһиги бэйэбитин, чугас дьоммутун, оҕолорбутун, аҕа саастаах көлүөнэни харыстыахпыт. Онон түгэнинэн туһанан, биир дойдулаахтарбар бэйэҕит уонна чугас дьоҥҥут иннигэр эппиэтинэстээх сыһыаҥҥыт иһин махтаныахпын баҕарабын. Бу быыһык кэми санаабыт күүһүнэн, бэйэ-бэйэбитигэр харыстабыллаах сыһыаммытынан этэҥҥэ туоруохпут диэн эрэнэбин.
Саха Өрөспүүбүлүкэтин Ил Түмэнин аатыттан бар дьоммун өссө төгүл Өрөспүүбүлүкэбит күнүнэн итиитик-истиҥник эҕэрдэлиибин.
Эһиэхэ уонна чугас дьоҥҥутугар чэгиэн доруобуйаны, күүстээх санааны, тулууру уонна инникигэ эрэли баҕарабын. Бэйэҕитин харыстана сылдьыҥ! Дьоллоох буолуҥ!
Саха Өрөспүүбүлүкэтин Ил Түмэнин
Бэрэссэдээтэлэ П.В. Гоголев
- 0
- 0
- 0
- 0
- 0
- 0