Мантан инньэ суут дьыалатыгар кыайыылаах тахсыбыт адвокаттарга “ситиһии гонорарын” биэриэхтэрэ. Оттон аэропортарга харабыллар электрошокердары туттар буолуохтара. Өссө биир сонун -- быраас биир эми атынынан солбуйбутун дьон өйдүүрэ кыаллыаҕа. Кулун тутартан өссө туох уларыйыы киирдэ?
Пациеннар наадалаах эми ылыахтара
Препараты атын майгынныыр эминэн солбуйарыгар быраас ити эмп төһө көдьүүстээҕин туһунан бэйэтин өйдөбүлүнэн буолбакка, чуолкай методиканан салайтарыахтаах. Билигин биир эми атынынан солбуйуохха сөп диэн исписэлиистэр этэллэрэ нуормалыыр аактаҕа буолбакка, ардыгар кинилэр билиилэригэр эрэ олоҕурар. Оттон күүһүгэр киирбит сокуон бырааска чопчу өйдөбүллэри уонна эмтэр хардарыта солбуһалларын быһаарар методиканы биэриэҕэ. Доруобуйа харыстабылын министиэристибэтин сорудаҕар олоҕуран, ханнык эмтэри тугунан солбуйары экспердэр тэрилтэлэрэ быһаарыаҕа. Ити сибидиэнньэлэри барытын эмп препараттарын Уопсай каталогар киллэриэхтэрэ.
Маны сэргэ чопчу ыарыһахха эбэтэр ыарыһахтар бөлөхтөрүгэр ураты наадалаах медицинскй көмөнү оҥорор туһуттан Россияҕа регистрацияламматах, састаабыгар наркотическай эбэтэр психотропнай эттиктэрдээх эмтэри дойдуга киллэриини сокуон көҥүллүүр.
Итинник препараттары ыларга бу түгэҥҥэ атын, регистрацияламмыт эмтэр көдьүүһэ суохтарын эбэтэр олору туһанар кыаллыбатын туһунан быраас хамыыһыйатын быһаарыыта ирдэниэҕэ.
Ыарыылар кэрискэлэрин, ону сэргэ киллэриллэр препараттары доруобуйа харыстабылын министиэристибэтэ бигэргэтэр. Ону баайдара федеральнай бас билиигэ баар судаарыстыбаннай унитарнай тэрилтэлэр аҕалар кыахтаныахтара.
Адвокаттарга – «ситиһии гонорара»
Адвокаты кытта дуогабарга киниэхэ наҕараада кээмэйэ бэриллибит көмө түмүгүттэн тутулуктанарын туһунан усулуобуйаны киллэрэр кыаллыаҕа. Манна холуобунай дьыаланы суукка көрүү уонна административнай сокуону кэһии туһунан дьыаланы көрүүлэр киирбэттэр. Көмүскээччилэргэ “ситиһии гонорарын” көҥүллүүр сокуон күүһүгэр киирдэ.
«Ситиһии гонорара» сөптөөх быһаарыы буоларын Госдума сокуону оҥорууга уонна судаарыстыбаннай тутууга кэмитиэтин бэрэссэдээтэлэ Павел Крашенинников бэлиэтиир. Ол курдук, бу иннинэ юристарга ити гонорар син биир бороҥ схеманан төлөнөрүн итиэннэ туһааннаах адвокаттар палааталарын бүддьүөтүн ааһа барарын этэр.
Итини таһынан, адвокаттар кабинеттарын, адвокаттар коллегияларын уонна бюроларын тэрийиигэ наадалаах ыстаастара билиҥҥи 5 сылтан 3 сылга диэри намтыыр.
Аэпортары харабыллааччыларга – электрошокер
Кулун тутар 2 күнүттэн тырааныспарга куттал суох буолуутун салаатын үлэһиттэрэ, чуолаан, аэропортарга харабыллар электрошокердары туһаныахтарын сөп.
Холобур, хара санаалаах дьон инфраструктура объектарыгар уонна тырааныспарга бэйэтигэр саба түһэр түгэннэригэр ити көҥүллэнэр. Маны сэргэ тырааныспарга куттал суох буолуутун салаатын үлэһиттэригэр эбэтэр пассажирдарга туһуламмыт өһүөннээх дьайыыны тохтотууга уонна сокуону кэһээччи утарсыытын туоратыыга анаан ити прибордары туһаныахха сөп.
Ону таһынан, гражданнар буруйу оҥорор кэмнэригэр куота сатыыр түгэннэригэр эбэтэр “кинилэр саа-сэп көмөтүнэн утарсар санаалаахтарын туоһулуур олохтоох төрүөттэр баар буоллахтарына”, ити тэриллэр кинилэри тутан ылыыга туһаныллыахтарын сөп.
Ол эрээри хат дьахталларга, инбэлиит дьоҥҥо уонна кыра саастаах оҕолорго электрошокердары туттуу бобуллар.
Сокуоннайа суох лотереяны тэрийээччилэргэ кислороду сабыахтара
Кулун тутар 28 күнүттэн сыаналаах кумааҕылар ырыынактарын кыттааччыта сүүйсүүлээх оонньуулары уонна лотереялары сокуоннайа суох ыыппыта билиннэҕинэ, кини ити ырыынакка идэтийэн үлэлииригэр бэриллибит лицензияны Россия Баана тутан ылыаҕа.
Бу иннинэ үп миниистирин солбуйааччыта Алексей Моисеев быһаарбытынан, урут сүүйсүүлээх оонньуулар үгүстүк лотереялар, букмекерскай уонна да атын итинник үлэлэр, ол иһигэр бинарнай опционнар көрүҥнэринэн ыытыллаллара.
Маны таһынан, сокуон этэринэн, букмекерскай хонтуораҕа сүүйсүүлээх оонньуулары тэрийээччилэр баан мэктиэтин ылбыттарын, хаттаан оҥотторбуттарын кэннэ 10 күнү аһарбакка эрэ ол куопуйатын былаас уорганнарыгар биэрэр эбээһинэстэнэллэр. Ону сэргэ кинилэр баан мэктиэтигэр эбэһээтэлистибэлэрэ тохтуурун туһунан иһитиннэрэр эбээһинэстээхтэр.
Ретро массыыналарга экспертиза оҥоһуллуоҕа
Эргэ уонна ретро массыыналарга тырааныспар пааспарын ылар туһугар анал экспертизаны ааһыы ирдэнэр. Итиниэхэ Росстандарт бигэргэтиитинэн саҥа ГОСТ баар буолла.
Бу быраабыла 30-тан тахса саастаах массыыналарга тэнийэрэ сабаҕаланар. Экспердэр собуот таһаарбытыттан элбэх туорааһыны булан ыллахтарына техпааспары биэриэхтэрэ суоҕа, ол эрээри массыына хаһаайына хаттаан көрүүнү ааһар бырааптанар. Урукку өттүгэр 30-тан аҕа саастаах массыыналары сыаналааһын суох этэ.
Касса чектэрэ саҥа көрүҥнэниэхтэрэ
Кулун тутар ыйтан кассаларга кумааҕы чек көрүҥэ уларыйар – бэлиэлээх табаар аатын сэргэ “М” буукуба баар буолуоҕа.
Электроннай чеккэ маркировка (бэлиэ) кода эрэ көстүөҕэ. Чуолаан, ити арыгыга, табахха, түүлээх оҥоһуктарга чектэри таарыйар.
Электроннай көһүлүөгү хатыыр туһунан тустаахха иһитиннэриэхтэрэ
Кулун тутар 28 күнүттэн харчыны тиэрдиигэ оператордар клиеҥҥэ кини электроннай көһүлүөгэ уонна/эбэтэр баан картата тохтотулларын туһунан СМС-иһитиннэриинэн эбэтэр эрийэн биллэриэхтэрэ. Маныаха кини ити туохтан тахсыбытын төрүөтүн ыйыахтаах.
Бу иннинэ саарбахтанар харчыны уонна төлөбүрдэри ыытыыны тохтотору сокуон көҥүллүүр этэ.
Лицензиянан өҥөлөрү оҥоруу бэрээдэгэ көннөрүлүннэ
Лицензияланар үлэ көрүҥэр сыһыаннаах өҥөлөрү лицензияҕа ыйыллыбатах миэстэҕэ да оҥоруохха сөп буолуоҕа. Онуоха анаан докумуону хаттаан оҥотторор ирдэммэт.
Урут ити бобуллара. Маныаха, сорох түгэннэргэ, холобур, өрөмүөҥҥэ наадыйар сэрии сэбэ уонна байыаннай техника ханнык миэстэҕэ баар буоларын эрдэттэн быһаарар кыаллыбат. Чуолаан, сөмөлүөт көтөрүгэр эбэтэр байыаннай хараабыл бохуотун кэмигэр итиннэ наадыйыы үөскүөн сөп.
Елена БАИШЕВА
-
0
-
0
-
0
-
0
-
0
-
0
