Бүгүҥҥүттэн ыла киһи тус дааннайдарын туһаныыга өссө биир ирдэбил киирдэ -- “тугу да биллэрбэтэ, онон «по умолчанию» тус дааннайдарын туһанабыт” диэн сыһыан кытаанахтык бобуллар буолла.
Аны туран, аһаҕастык тарҕатыыга дааннайдарыттан тугу чопчу (аатын-суолун дуу, төлөпүөнүн нүөмэрин дуу, электроннай почтатын аадырыһын дуу, о.д.а) туһаналларын киһи бэйэтэ талан ыйыахтаах. Операторга “сотторуҥ” диэтэ да, тута туох баар дааннайын сотторуохтаахтар.
--30 мөл. солкуобайтан элбэх дохуоту киллэрэр атыыһыттар бүгүҥҥүттэн саҕалаан бэс ыйын 30 күнүгэр диэри “Мир” каартанан төлөһөр кыаҕы хааччыйыахтаахтар.
Юстиция министиэристибэтин Реестригэр киирэр туһунан сайабылыанньаны биэрбэтэх иноагеннар мантан инньэ холуобунай эппиэтинэскэ тардыллаллар. НКО иноагеннара маркировката суох матырыйааллары оҥорон таһааран тарҕаттахтарына, 300-500 тыһ. солк. ыстарааптаналлар.
Уопсастыбаннай тырааныспарга 16 саастарын туола илик оҕолор төрөппүтэ суох айаннаан иһэр буоллахтарына, “төлөбүргүт суох” эҥин диэн, кинилэри үүрэр, тахсалларыгар күһэйэр кулун тутар 7 күнүттэн бобуллар.
Биэнсийэ пуондатыгар тиийэн, тус счеккутугар үлэҕит киниискэтигэр 2020 сыл тохсунньу 1 күнүгэр диэри суруллубут сибидиэнньэлэргитин киллэртэриэххитин сөп. Маннык дьаһаныы үлэ ыстааһын, ханна, тугу үлэлээбиккин туһунан информацияны үлэ биэрээччиҥ тута билэригэр табыгастаах.
Омук гражданнара Арассыыйаҕа бэйэлэрин бултуур сааларын уонна ботуруоннарын илдьэ киллэриэхтэрин сөп, өскөтүн Росгвардия көҥүллээтэҕинэ. Аны ол көҥүллэрэ бүттэҕинэ, төттөрү дойдуларыгар таһаарыахтаахтар. Бу сокуон кулун тутар 9 күнүттэн киириэ.
Кадастровай комплекснай үлэни билигин бүддьүөт суотугар оҥорторобут. Кулун тутар 23 күнүттэн интэриэстээх физическэй, юридическай сирэйдэр бэйэлэрэ төлөөн оҥорторор буолуохтара.
- 0
- 0
- 0
- 0
- 0
- 0