«Биир ньыгыл Арассыыйа» баартыйа дьокутааттара «фудшеринг» диэн ис хоһоонноох сокуон барылын оҥороллор. Бу сокуон барыла  туһаныллыахтаах болдьоҕун ааһан эрэр кэмнээх, ол эрэн буорту буолбатах бородуукталары нэһилиэнньэ тус наадыйыытыгар түҥэтэр маҕаһыыннары НДС-тан босхолуурга туһуланар. Итинник көҕүлээһининэн Госдумаҕа ыччат бэлиитикэтин сис кэмитиэтин баһылыга Артем Метелев тыл көтөхтө.

«Бу боппуруоһу «Биир ньыгыл Арассыыйа» координационнай Сэбиэтигэр иһитиннэрэри былаанныыбын уонна сыл бүтүөр диэри сөптөөх уларытыылары дьокутааттар көрүүлэригэр киллэрэргэ дьулуһабын», - диэбитин «Газета.Ru» бэлиэтиир. Билигин биисинэскэ ас-үөл болдьоҕо бүтэрин күүтэн, суох оҥорор быдан барыстаах. Маннык түбэлтэҕэ 10-20% НДС төлөөбөттөр.  

Волонтердар көмөлөрүнэн «Мы вместе» акция чэрчитинэн 7 мөл. кэриҥэ киһи үтүө өйөбүлү туһаммыта. Бу акция кээмэйин улаатыннарыахха сөп, холобур, НДС нолуогуттан босхолоон, итинник табаардары коммерческайа суох тэрилтэлэргэ (НКО) түҥэтэр буоллахха», — диэн Артем Метелев кэпсиир. Дьокутаат этэринэн, билигин дойду үрдүнэн  17 мөл. туонна бородуукта суох оҥоһуллар, быһа холоон табаар хоромньута 1,5 трлн. солк. тэҥнэһэр. Бу бородуукта сорох чааһын туһаҕа таһааран, мөлүйүөнүнэн гражданнарга көмөлөһүөххэ сөп. Онуоха Нолуок Кодексыгар уларытыылары киллэриэххэ наада. Фудшеринг быраактыка Арассыыйаҕа дьадайыыны утары охсуһуу ньымалартан биирдэстэринэн буолуон сөп. 

Оттон Госдумаҕа «Биир ньыгыл Арассыыйа» баартыйа фракциятын бастакы солбуйааччыта Дмитрий Вяткин этэринэн, фудшеринг хамсааһына сокуон таһымыгар кэккэ боппуруостары үөскэтэр. «Табаары ким ылыахтааҕый, чуолаан, ханнык табаар туһунан этиллэрий, хайдах харайылларын чуолкайдыахха наада. Холобур, болдьоҕо бүтүөр диэри төһө кэм хаалыахтааҕын туһунан»,- диир Дмитрий Вяткин.

Экэниэмикэ сайдыытын министиэристибэ «Биир ньыгыл Арассыыйа» баартыйа көҕүлээһинин өйөөтүлэр. Онно эбии нолуоктан аһы-үөлү  эрэ буолбакка, бастакы наадалаах табаардары эмиэ киллэрэр куһаҕана суоҕун бэлиэтээтилэр. Бырайыагы уопсастыбаннай диэйэтэллэр уонна биисинэс бэрэстэбиитэллэрэ өйөөтүлэр: «Азбука вкуса» супермаркеттар ситимнэрэ, «Магнит» маҕаһыыннар, «Опора России» уопсастыбаннай холбоһук, уо.д.а. Ол эрэн, быһаччы эбии атын баҕа санааларын толорор эрэ түгэннэригэр.