Саха Өрөспүүбүлүкэтин оҕолорун уопсастыбаннай холбоһуктарын сойууһун уонна Дьокуускай куорат 7-с №-дээх орто оскуолатын көҕүлээһиннэринэн, куорат киинигэр меценатство скверин бырайыактааһын үлэтэ саҕаланна. Дьокуускай архитектураҕа уонна куорат тутуутугар департаменын салайааччыта Семен Сергеев иһитиннэрбитинэн, ити идиэйэни өйөөн, Курашов уулуссатын кытыытыгар тахсыбыт аһаҕас былаһаакканы анаабыттар.

Ааспыт ыйга көҕүлүүр бөлөх куорат киин уокуругун олохтоохторун санаатын билээри, Интэриниэт ситимигэр ыйытык ыыппыттарыгар, үгүс киһи биһирээн, бу санааҕа кыттыспыта. Кырдьык, инники күөҥҥэ сылдьар дьоммут бэйэлэрин үптэрин-астарын бар дьон туһугар аныыллара, сайдыыга туһуламмыт үлэлэрэ, киллэрсибит кылааттара үйэтитиллиэхтээх, киэҥ эйгэҕэ тарҕаныахтаах уонна атыттары үтүө санааҕа күөртүөхтээх.

«Г.В. Никифоров-Манньыаттаах Уола, С.П. Барашков уонна В.Ф. Артамонов диэн атыыhыттар Илин Хаҥалас улууhун кыаммат ыалларын оҕолоро, атыттартан хаалсыбакка, үөрэҕи баһылыылларыгар диэн, бэйэлэрин баҕаларынан пансион дьиэтин туттарбыттара. Бу икки этээстээх мас дьиэҕэ араас сылларга атын-атын үөрэх тэрилтэлэрэ үлэлээн ааспыттара. Онтон кэлин, 1935 сылтан, биһиги оскуолабыт олохсуйбут. Историяҕа сигэнэн, маҥнайгы үктэли Манньыаттаах Уола уурсубут диэн этэр кыахтаахпыт. Ол да иһин буолуо, бэйэбитин бу тиэмэҕэ кыттыгастаах курдук сананабыт», – диэн кэпсиир бырайыак ааптардарыттан биирдэстэрэ, 7-с №-дээх оскуола завуһа Ия Прохорова.

Көҕүлүүр бөлөх салайааччыта, Дьокуускай куорат 10-с №-дээх орто оскуолатын дириэктэрин солбуйааччы Антонина Яковлева сквер суолтатын туһунан субу курдук билиһиннэрэр:

«Сквер ортотугар Г.В. Никифоров-Манньыаттаах Уолугар аналлаах аныгылыы истииллээх стела былааннанар. Кэннигэр икки улахан истиэндэлээх буолуоҕа. Манна урукку кэмтэн билиҥҥигэ диэри аатырбыт-сураҕырбыт, өрөспүүбүлүкэ сайдыытыгар  улахан өҥөлөөх меценаттарбыт ааттара киириэҕэ, салгыы аһаҕас миэстэлэри эмиэ хаалларыахпыт. Меценатство идиэйэтэ кэҥээн-тэнийэн истэҕин аайы, онно эбии суруллан иһиэ».

Саха Өрөспүүбүлүкэтин оҕолорун уопсастыбаннай холбоһуктарын сойууһун бэрэссэдээтэлэ Геннадий Охопков чуолкайдыырынан, сквер дьон сынньанар, күүлэйдиир миэстэтин эрэ курдук буолбакка, оҕо-ыччат эйгэтигэр тэрээһиннэри ыытар, көхтөөх дьону түмэр былаһаакка быһыытынан толкуйдаммыт.

«Ханнык баҕарар историческай личность эбэтэр миэстэ информацияны дьоҥҥо тиэрдэр, кэпсиир, дьайар суолталаах  буолуохтаах. Маныаха сквер кытыытыгар сыана оҥорор былааннаахпыт. Халлаан сылаас кэмигэр таһырдьа тахсан, оҕолору, ыччаты кытта үлэлиэхпит. Хас биирдии тэрээһиммит меценаттар туһунан кэпсээнтэн саҕаланыа. Үүнэр көлүөнэни патриоттуу тыыҥҥа иитэргэ сабыдыаллаах буолуоҕа. Кыһыҥҥы кэмҥэ ол сыанабытыгар муус оҥоһуктар галереяларын туруоруохпутун сөп», – диэн санаалаах Геннадий Иванович.

Кырдьык, меценаттар уонна попечителлэр олохторун, үлэлэрин, киллэрсибит кылааттарын үөрэтии олус дириҥ суолталаах. Маныаха ааптардар: “Ирдэбил уонна чинчийэр үлэлэри”, -- ыытыахпыт дииллэр. Кинилэр аймахтарын, чугас дьонун кытта билсэн, сибээстэһэн, хас биирдиилэрин ааттарын үйэтитэргэ үлэлиир санаалаахтар. Онтон оскуола дьаһалтата биисиснэс кылаастары, бырайыактары сүрүннүүр былааннааҕын кэпсээтэ.

Ия Прохорова салайыытынан оскуолаҕа «ДИМСИ» диэн оҕо уопсастыбаннай түмсүүтэ үлэлиир. Кинилэр сквери көрөн-харайан, үлэни тэрийэр хамыыһыйа  быһыытынан ылынарга бэлэмнэр.

«Ыраастааһын, көҕөрдүү, сибэккилэргэ уу кутуу, араас мастары олордуу сылааҕы үлэбит экологическай хайысхатыгар сөп түбэһэр. Оҕолор бэйэлэрэ бырайыактаан, ыскамыайкалары, скворечниктары, клубмалары оҥорор былааннаахтар. Номнуо барытын толкуйдаан олороллор. Дьэ, оччоҕо тыыннаах эйгэ олохтонуо этэ. Ити барыта оҕолорбутугар эппиэтинэһи, туларыыр эйгэҕэ харыстабыллаах сыһыаны олохтуур», – диэн уопуттаах педагог Ия Егоровна кэпсээнин түмүктээтэ.

Күндү аҕааччыларбыт! Бу күннэргэ «Норуот бүддьүөтэ-2021» диэн бастыҥ көҕүлээһиннэри талар уонна үбүлүүр куонкурус куоластааһын түһүмэҕэ «One click Yakutsk» саайка буола турар. Сквер тутуутун көҕүлүүр бөлөх Саха сирин уонна Дьокуускай куорат олохтоохторун идиэйэни өйүүргэ, куоластыырга ыҥырар. Интэриниэт куоластааһын сэтинньи 20 күнүгэр түмүктэниэ.

Санааҕын биллэр, куоластааһыҥҥа кыттыс: https://yakutia.click/idea/regions/concepts/?location=1&settlement=610&category=&status=&range=&paginate_by=8