Мэлдьи ымсыырар Европабыт үгүс дьоно-сэргэтэ муус сүрэхтээхтэрин, бэйэлэрин иннилэрин эрэ көрүнэллэрин, аан дойдуну аймаабыт коронавирус кэмигэр Италия холобуругар көрдөрдүлэр. Кинилэргэ Арассыыйа, Кытай уонна Куба көмө-өйөбүл буолбуттарын бары билэҕит. Оттон биир сойууска түмсэн олорор судаарыстыбалар, этэргэ дылы, кымаардаан да көрбөтүлэр. Ити сайдыылаах дойдуларга бэйэмсэх буолуу, сүрэх мууһуруута, материальнай сыаннаһы өрө тутуу бүрүүкээбитэ ырааппытын үгүстэр билэр-көрөр буолуохтааххыт. Итиннэ киирсэр судаарыстыбалары коронавирус күүскэ сутуйуутун биир төрүөтэ онно сытар дии саныыбын. Барытын тэҥниир, аһара барбыты оройго биэрэр Үрдүкү күүс баарыгар дьон-сэргэ өссө төгүл итэҕэйбит буолуохтаах. Өбүгэлэрбит «үтэһэтэ туолбут» диэн мээнэҕэ эппэттэрэ.
Оттон Сахабыт сиригэр бу уустук быһыыга-майгыга ким тугу сатыырынан, кыайарынан дьоҥҥо, ытык кырдьаҕастарбытыгар, кырачааннарга, элбэх оҕолоох ыалларга күүс-көмө буолалларыттан киһи эрэ санаата көтөҕүллэр.
Герой холобурун батыһыҥ
Билэргит курдук, коронавирустан сылтаан аан дойду дьоно харантыыҥҥа дьиэҕэ хаайтаран олороллор. Аныгы технологиялар үйэлэригэр оҕолорбут дьиэлэригэр олорон, онлайн үөрэнэн эрэллэр. Ол эрээри манна мэһэйдэр, кыһалҕалар суох буолбатахтар.
Сорох сирдэргэ сибээс мөлтөх. Маны таһынан, кистэл буолбатах, оҕолоругар барыларыгар аныгы гаджет атыылаһар кыахтара суох элбэх оҕолоох ыалларбыт, аҥаардас ийэлэр, аҕалар элбэхтэр. Эбэтэр биир дьиэ кэргэҥҥэ хас да киһи, оҕо итинник тэрилинэн тэҥҥэ туттар түгэннэрэ эмиэ баар. Маны таһынан хас дьиэ кэргэн ахсын Интернеккэ холбонуу эмиэ кыһалҕанан буолара баар чахчы.
Уус Алдан улууһугар Үлэ Албан аата уордьан толору кавалера, Үлэ Геройа, чулуу ыанньыксыт Михаил Готовцев үөһээ ааттаталаабыт кыһалҕалары өйдөөн, Танда сэлиэнньэтин элбэх оҕолоох дьиэ кэргэттэригэр биэс саҥа төлөпүөнү бэлэхтээтэ. Бу үтүө холобуру атыттар, үгүөрү үптээх-харчылаах дьоммут хабан ылан батыһыахтара диэн эрэнэбин.
Мааскалары бэлэхтээһин элбээтэ
Биллэрин курдук, хайа баҕарар вирустан биир харыстанар ньыманан маасканы кэтии буолар. Коронавирус турбутугар өрөспүүбүлүкэ аптекаларыгар биирдэ туттуллар мааскалар начаас икки ардыгар атыыга бүтэн хаалбыттара.
Өрөспүүбүлүкэ бары муннуктарыгар үтүө санаалаах кэрэ аҥаардар ытык кырдьаҕастарга, оҕолорго мааскалары тигитэлээн бэлэхтээтилэр, бэлэхтии да тураллар.
Сорохтор мааска тигэн атыылаан, кыра дохуот киллэриннилэр. Онон баар балаһыанньаттан таҕыстылар.
Бу үтүө хамсааһыны өйөөн, көҕүлээн өрөспүүбүлүкэ Ил Дархана Айсен Николаев инстаграмыгар куонкурус биллэрдэ.
Сарсыҥҥы күҥҥэ эрэли
Коронавирус турбутугар, дьоҥҥо-сэргэҕэ куттал суоһаабытыгар ыччат туора турбата. Амарах санааларынан, дьыаланан үүнэр-сайдар кэскиллээхпитин туоһулууллар.
Ол курдук, өрөспүүбүлүкэбитигэр волонтердар хамсааһыннара тэриллэн, дьиэҕэ олорор ытык кырдьаҕастарбытыгар күүс-көмө буола сылдьалларын бары билэн-көрөн олороҕут. Барыта балтараа тыһыынча волонтер төлөпүөнүнэн киирбит сакаастары толороллор. Саастаах дьоммутугар бородуукталарын, эмтэрин-томторун атыылаһан, дьиэлэригэр илдьэн биэрэллэр.
Волонтердар туох баар ирдэбиллэри тутуһаллар. Мааскаларын, бэрчээккилэрин кэтэ сылдьаллар. Саастаах дьон дьиэлэригэр миэтэрэ курдук тэйиччи сиргэ атыыласпыт бородуукталарын хааллараллар.
Сорох кыргыттар мааскалары тигэннэр, ытык кырдьаҕастарбытыгар бэлэх туттараллар. Өрөспүүбүлүкэбитигэр күн-түүн волонтер буолуон баҕалаах амарах санаалаах ыччат, дьон ахсаана элбии турара санааны көтөҕөр, сарсыҥҥы күҥҥэ эрэли үөскэтэр.
Маны таһынан Дьокуускайга олорор 722 уруута-аймаҕа суох кырдьаҕастарга, инбэлииттэргэ социальнай үлэһиттэр олорор дьиэлэрин хомуйаллар, бородуукталарын атыылаһаллар, доруобуйаларын туруктарын кэтээн көрөллөр.
Ырыа хаһан баҕарар санааны чэпчэтэр
Биллэрин курдук, тыйыс тымныылаах Сахабыт сиригэр уһун кыһыны быһа дьиэҕэ хаайтарабыт. Күүтүүлээх-кэтэһиилээх сандал сааспыт кэлбитигэр, таһырдьа дьаарбайбакка, салгын сиэбэккэ, тыын наадабытыгар эрэ тахсан, түөрт эркини көрөн дьиэҕэ хаайтарыы манан аҕай дьыала буолбатах. Сорохтор манныгы уйумуохтарын сөптөөх.
Хаһыаппыт сайтыгар Саха сирин турок доҕоро Умит Шаһин «Бииргэ ыллыахха» диэн инстаграмыгар аһаҕас эфиринэн гитаранан ырыалары бэлэхтээбитин, дьиэҕэ хаайтаран олорор дьону сэргэхсиппитин туһунан суруйан турабын.
Өрөспүүбүлүкэбит ыллыыр-туойар талааннаах дьоно инстаграмынан эмиэ кэнсиэрдээн, киһи дууһатын ортотунан сайан киирэн ырыалары бэлэхтээн, биир дойдулаахтарын үөрдэллэр-көтүтэллэр. Ол курдук, эстрадабыт биллэр ырыаһыта Байбал Сэмэнэп ытыктыыр киһибит Христофор Максимов төрөөбүт күнүгэр бар дьонугар баянынан уонна гитаранан үгүс ырыалары ыллаан бэлэхтээтэ. Бу иннинэ Иннокентий Лебедев, Айсен Аммосов, Сайыына, Стас Федоров эмиэ онлайн-кэнсиэр бэлэхтээн тураллар. Оттон биллэр шоумэн Клим Федоров өрөспүүбүлүкэ дьонун-сэргэтин харантыын кэмигэр хайдах аралдьытар бырагырааманы толкуйдаан онлайн үлэлии-хамсыы олорорун туһунан хаһыаппыт кэлэр нүөмэригэр сиһилии сырдатыам. Ааҕааччым, кэтэс. Мин билбэппинэн-көрбөппүнэн араас хабааннаах үтүө дьыаланы оҥоро сылдьааччылар элбэх буолуохтаахтар.
Онон ким тугу кыайарынан, сатыырынан үтүө дьыалалары оҥорон, бу уустук кэми чэпчэтэн, дьоннорун-сэргэлэрин өйүүр-көмөлөһөр сырдык санаалаах дьоммутугар барҕа махтал тылларын аныахпытын наадалаах. Тыйыс тымныылаах сиргэ-уокка амарах санаалаах дьоммут элбэхтэрэ — табыллыыбыт, тугунан да кэмнэммэт дьолбут.
- 0
- 0
- 0
- 0
- 0
- 0